Relijioza na’in-ida submete hela ba swab teste iha Sentru Integradu Jestaun Krize (SIJK), tersa (10/08/21). Imajen Tatoli/António Gonçalves.

DILI, 11 agostu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu pozitivu 153, rekoperadu 25 no kazu ativu 1.672.

“Kazu foun 153 mai hosi Dili 66, Ermera 37, Covalima 35 no munisípiu seluk hamutuk 15 kompostu hosi mane 77 no feto 76,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, kuarta ne’e.

Notísia relevante:COVID-19, óbitu ida, pozitivu 138 no ativu 1.544

Hosi totál kazu detetadu foun ohin, ho idade 20-30 (19,6) entre tinan 12-59 na’in 118 (77,1%), idade 60 mai karaik  na’in-lima, hosi kazu foun ohin 66 kazu ka 43,1% sintomátiku.

Kumulativu kazu konfirmadu sura hosi 21 marsu 2020 to’o 11 agostu 2021 hamutuk 11.870. Hosi horisehik mai ohin, teste ne’ebé Laboratóriu Nasionál Saúde halo hamutuk 561 PCR, ho detallu hanesan tuir-mai, Vijilánsia sentinela na’in  39, rastreiu ba kontaktu ka Contact tracing  145,  Rastreiu Aleatóriu  ka Random Screening nain 13, viájen sai-hosi serka sanitária hosi Dili 263,  Viájen internasionál na’in-ida, Follow up iha kuarentena na’in 100.

Totál testes PCR ne’ebé halo horisehik 10 agostu iha munisípiu-sira seluk, RAEOA no HNGV hamutuk 410, ho detalla hanesan tuir-mai, Maubisse74, Maliana 40, Viqueque 18, Suai 51, Baucau 128, Ermera 10, RAEOA 43 no HNGV 46.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 11 agostu tuir sistema informasaun Saúde iha Ministériu Saúde, totál  kumulativu 1ª doze iha Dili (69,4%) no  totál  kumulativu 2ª doze  iha Dili (46,5%).

Ema ne’ebé simu ona vasina doze dahuluk iha Timor-Leste (45,4%) no simu ona doze daruak (15,3%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 7,9 /100 mil abitante, enkuantu ba de’it munisípiu Ermera 17,6/100 mil abitantes.

Iha semana ida-ne’e, insidénsia iha munisípiu Dili 13,5/100 mil abitantes, tuir kedan ho  RAEOA  ho insidénsia 9,3/100 mil abitante, hafoin ho munisípiu Covalima ho insidénsia  11,0/100 mil abitante no  Bobonaro  ho insidénsia  6,1/100 mill abitante.

Ida-ne’e hatudu katak, insidénsia munisípiu Ermera nian maka a’as-liu, entaun  munisípiu tolu – Ermera, Dili, RAEOA  ho Covalima – mak iha risku bo’ot liu atu populasaun hetan da’et, no hada’et tutan virus SARS-CoV-2, iha komunidade-nia le’et.

Iha 11 agostu 2021, izolamentu Vera Cruz halo tratamentu ba kazu detetadu na’in 30, iha área obstetrisia na’in-hitu no iha medisina interna na’in  20,  iha sirurjia na’in-rua, pediatria na’in-ida.

Iha obstetrisia  na’in-hitu kategoria kamán hotu. Iha área medisina interna na’in 20. Ualu  kategoria grave (ida uza ventiladór)  na’in-hitu uza oksijéniu, na’in-10 kategoria  moderadu, na’in-tolu kategoria kamán. Sira na’in-ida iha sirurjia kategoria kamán hotu, na’in-ida pediatria kategoria kamán.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan mak sei baixa ho kategoria moderadu no grave.

Apela ba populasaun iha Timor-Leste laran tomak, maski karik simu ona vasina, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira-ne’e, mak hanesan uza máskara, fase liman beibeik ho sabaun ka dezinfektante ruma, evita kose liman ba matan, inus ho ibun, bainhira kumprimenta-malu, la presiza ka’er-liman, bensa-liman, rei-malu ka haku’ak-malu, evita halibur-malu barak  hamri’ik ka tur do’ok hosi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here