Sentru Integradu Jestaun Krize (SIJK) kontinua atende komunidade ne’ebé hakarak halo swab teste, tersa, (10/08/21). Imajen Tatoli/António Gonçalves.

DILI, 10 agostu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu óbitu ida, pozitivu 138, rekoperadu 15 no kazu ativu 1.544.

“Totál óbitu ne’ebé relata ohin, timoroan mane na’in-ida ho idade 71, ne’ebé enkamiña hosi Ospitál Referénsia Eduardo Ximenes Baucau, iha 07 agostu 2021, ho diagnóstiku Sindroma Insufisiénsia Respiratória Aguda (SIRA), Xoke Séptiku no Pneumonia tanba COVID-19, rezultadu PCR, 5/8/2021: CT Egene 36.8, N2 gene 40.3,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, tersa ne’e.

Notísia relevante:COVID-19: óbitu ida, pozitivu 50 no ativu 1.422

Iha loron ne’e kedan, ekipa médika espesializada halo tratamentu tuir protokolu ne’ebé iha no iha 09 agostu, matebian iís-kotu tanba multiple organ failure.

Ninia rezultadu PCR post mortem (hafoin iis-kotu) negativu no Familia lori mate-isin ba haloot iha munisípiu Baucau.

Kazu foun ohin iha 138 maihosi Dili 78 no munisípiu seluk hamutuk 60 kompostu hosi mane 74 no feto 64.

Hosi totál kazu detetadu foun ohin, ho idade 20-26 mai karaik na’in-tolu, entre tinan 12-59 na’in 109 (79%), idade 60 mai karaik na’in-tolu. Hosi kazu detetadu foun ohin 65 kazu ka 47,1 % sintomátiku (hatudu sintomas).

Kumulativu kazu konfirmadu sura hosi 21 marsu 2020 to’o 09 agostu 2021 hamutuk 11.717. Hosi horisehik mai ohin, teste ne’ebé Laboratóriu Nasionál Saúde halo hamutuk 388 PCR, ho detallu hanesan tuir-mai, Vijilánsia sentinela na’in 30, rastreiu ba kontaktu ka Contact tracing 77, Rastreiu Aleatóriu ka Random Screening nain 10, viájen sai-hosi serka sanitária hosi Dili 183,  Viájen internasionál 62, Follow up iha kuarentena na’in 26.

Totál testes PCR ne’ebé halo horisehik 09 agostu iha munisípiu-sira seluk, RAEOA no HNGV hamutuk 431, ho detalla hanesan tuir-mai, Maubisse71, Maliana 91, Viqueque sia, Suai 41, Baucau 108, Ermera sia, RAEOA 32 no HNGV 70.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 10  agostu tuir sistema informasaun Saúde iha Ministériu Saúde ho totál  kumulativu 1ª doze iha Dili (68,9%) no  totál  kumulativu 2ª doze  iha Dili (45,8%).

Alende ne’e ema ne’ebé simu ona vasina doze dahuluk iha Timor-Leste (42,7%) no simu ona doze daruak (15,0%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 6,7 /100 mil abitante, enkuantu ba de’it munisípiu Ermera 13,9/100 mil abitantes.

Iha semana ida-ne’e, insidénsia iha munisípiu Dili  11,9/100 mil abitantes, tuir kedan ho  RAEOA  ho insidénsia 8,6/100 mil hafoin ho munisípiu Covalima ho insidénsia  5,7/100 mil abitantes.

Ida-ne’e hatudu katak, insidénsia munisípiu Ermera nian mak a’as-liu, entaun munisípiu tolu – Ermera, Dili, RAEOA  ho Covalima – maka iha risku bo’ot liu atu populasaun hetan da’et, no hada’et tutan virus SARS-CoV-2, iha komunidade nia le’et.

Iha 10 agostu 2021, izolamentu Vera Cruz halo tratamentu ba kazu detetadu na’in 23, iha área obstetrisia na’in-sia, no iha medisina interna na’in  13,  iha sirurjia na’in-ida. Iha obstetrisia na’in-sia kategoria kamán hotu.

Iha área medisina interna  na’in  13. Hitu kategoria grave (ida uza ventiladór)  na’in-neen uza oksijéniu, na’in tolu kategoria  moderadu, na’in-tolu kategoria kamán. Na’in-ida iha sirurjia kategoria kamán hotu.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tán mak sei baixa ho kategoria moderadu no grave.

Apela ba populasaun iha Timor-Leste laran tomak, maski simu ona vasina, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira-ne’e mak hanesan uza máskara, fase liman beibeik ho sabaun ka dezinfetante ruma, evita kose liman ba matan, inus ho ibun bainhira kumprimenta-malu, la presiza ka’er-liman, bensa-liman, rei-malu ka haku’ak-malu, evita halibur-malu barak, hamri’ik ka tur do’ok hosi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here