Membru Governu no Deputadu sira halo debate konfirmasaun deklarasaun Estadu Emerjénsia, iha sala plenária Parlamentu Nasionál, tersa (10/08). Imajen TATOLI/Egas Cristóvão

DILI, 10 agostu 2021 (TATOLI)–Governu Timor-Leste komunika ona autoridade Indonézia atu halo deportasaun ba timor-oan hamutuk 113, ne’ebé Polísia Repúblika Indonézia (POLRI) liuhosi Komandu Belu, detein iha área Atambua, Nusa Tengara Timur (NTT).

“Ita halo ona koodernasaun liuhosi Ministériu Negósiu Estranjeiru no Kooperasaun (MNEK), ne’ebé komunika ba autoridade Indonézia atubele deporta timor-oan 113, ne’ebé detein iha Atambu tanba halo movimentu ilegál ba hasa’e sintu iha área jurizdisaun Indonézia nian,” Vise-Ministru Interiór, António Armindo, hateten, iha sala plenária Parlamentu Nasionál, tersa ne’e.

Notísia relevante: Autoridade seguransa Atambua detein Timoroan 113

Detensaun ne’e bazeia ba Governu liuhosi informasaun intelijénsia, ne’ebé identifika katak timor-oan kuaze 700-resin halo pasajen ilegál hakat fronteira atu tuir sermónia arte-marsiál.

Nune’e, governante ne’e dehan, informasaun ne’e hato’o ona ba parte autoridade Polísia Indonézia atu kontinua halo operasaun hodi detein no deporta, nune’e hela iha kuarentena hodi prevene variante foun delta.

“Ita hotu preokupa seguransa iha fronteira terrestre tanba COVID-19 ne’e tama iha Timor-Leste ultrapasa hosi fronteira terrestre,” nia akresenta.

Nune’e, Vise-Ministru husu ba sidadaun sira koopera ho autoridade seguransa no defeza atu asegura fronteira terrestre hodi tau-matan ba pasajen ilegál.

Governu mós nota katak, iha mós kestaun balun hanesan fasilita malu hakat fronteira tuir dalan ilegál.

Iha biban hanesan, Ministru Defeza,  Filomeno  Paixão de Jesus, rekoñese, iha difikuldade atu halo kontrolu iha fronteira terrestre, nune’e fó espasu ba sidadaun sira halo movimentu ilegál hodi fó risku lori variante foun tama mai territóriu nasionál.

“Ami hanoin la fasil ita atu kontrola movimentu ilegál iha fronteira kuandu serbisu ne’ebé halo laiha koordenasaun másima ho populasaun no ministériu, ne’ebé tenke serbisu integralmente hanesan Ministériu Interiór (MI) no Ministériu Defeza (MD), Ministériu Saúde (MS), Ministériu Administrasaun Estatál (MAE) no Ministériu Negósiu Estranjeiru no Kooperasaun,” nia subliña.

Kona-ba timor-oan ba hasa’e sintu, governante ne’e dehan, movimentu ne’e beibeik, tanba ne’e presiza halo koordenasaun ho MNEK atu haree asuntu ne’e iha nível a’as, tanba ho indikasaun bele afeta ba soberania Timor-Leste.

Postu atuál ne’ebé koloka iha fronteira terrestre hodi apoia servisu seguransa hamutuk hitu no daudaun ne’e iha ona estudu atu kontinua monta postu seluk iha área Fatu-lulik, badut-mean no zildape, ne’ebé asegura hosi ekipa konjunta hosi Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL).

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here