Diretor Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso.Imajen/Joanico de Araújo.

BOBONARO, 10 agostu 2021 (TATOLI)—Prizedente Asosiasaun Halibur Defisiénsia Matan Timor-Leste (AHMDTL), Gaspar Afonso, hateten joven ne’ebé hakarak susesu, tenke kuda uluk espíritu voluntarizmu iha fuan.

Gaspar Afonso hato’o asuntu ne’e bainhira sai oradór iha semináriu ho topiku ‘Espíritu voluntarizmu joven agora no uluk’, hodi komemora ezisténsia Asosisaun Halibur Defisiénsia Rejiaun Oeste (AHDRO), iha sede suku Lahomea, Maliana, tersa ne’e.

Notísia relevante:AHDMTL husu Governu halo tratamentu dignu ba ema ho defisiénsia sira

“Joven sira hakarak susesu tenke kuda uluk espíritu voluntarizmu iha fuan, atu manan esperiénsia ruma, nune’e, bainhira atu konkorre ba serbisu bele fásil hetan oportunidade. Ohin loron presija liu mak esperiénsia,” nia hateten.

Nia husu ba joven sira ohin loron nian atu banati-tuir, joven  sira uluk nian iha tempu rezisténsia, barak liu mak sakrifika aan iha serbisu oioin, liuliu serbisu voluntáriu oferese aan tomak ba Timor-Leste nia ukun rasik-an.

Gaspar Afonso enkoraza joven sira atu aprende atu la’o tuir prosesu, tenke brani hasoru uluk dezafiu, tanba laiha ema ida moris mai susesu kedan.

“Ha’u mós uluk sei kiik ha’u hanoin ha’u labele hakat ba oin, maibé afinál ha’u hakat ba oin no ha’u bele sai diretór, to’o instituisaun Estadu PDHJ mós nomeia ha’u sai Konsilleiru Konsultivu. Ida-ne’e tanba liu hosi serbisu voluntáriu la hare ba osan,” nia konta-tuir.

Ikusliu nia husu katak, presija mós banati-tuir serbisu voluntarizmu sosiál ne’ebé ema ho defisiénsia sira halo.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here