Komunidade kontinua simu vasina AstraZeneca iha Sentru Saúde Comoro, Dili, segunda (09/08/21). Imajen Tatoli/António Gonçalves.

DILI, 09 agostu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu óbitu ida, pozitivu 50, rekoperadu rua no kazu ativu 1.422.

“Totál óbitu ne’ebé relata ohin, feto timoroan ida ho idade 26, enkamiña hosi Ospitál Referénsia Maliana, iha 08 agostu  2021, ho diagnóstiku G4P3A0, isin-rua da-haat, partu dala tolu ona, laiha istória abortu, isin-rua semana 42, IUFD (bebé mate iha inan nia kanotak), Rutura uterina, Xoke ipovolémiku, no COVID-19,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, segunda ne’e.

Notísia relevante:COVID-19: Óbitu ida, rejista variante Delta na’in-12 iha Ermera

Nia dehan, iha loron ne’e kedan, ekipa médika espesializada halo operasaun sesariana, maibé bebé iis la iha ona, konfirma diagnostiku hosi Ospitál Referénsia Maliana. Rezultadu PCR ne’ebé halo ba bebé hatudu rezultadu negativu.

Hafoin operasaun sesariana, matebian la konsege rekopera ho di’ak, no ohin meiudia, i’is-kotu. PCR post-mortem (hafoin i’is-kotu) hatudu rezultadu pozitivu ho Cycle Threshold (CT) N2 gene 38,9 no Egene 36,8. Família koordena hela ho ekipa saúde atu hala’o funerál tuir protokolu ne’ebé adopta iha Timor-Leste.

Kazu foun ohin 50 hosi Dili 25, no munisípiu seluk hamutuk 25 ne’ebé kompostu hosi mane 25, feto 25. Hosi totál kazu detetadu foun ohin, ho idade 12 mai karaik  na’in-tolu, ho idade entre tinan 12-59 na’in 44 (88%), idade 60 mai karaik  na’in-tolu. Hosi kazu detetadu foun ohin 18 kazu ka 36 % sintomátiku (hatudu sintomas).

Kumulativu kazu konfirmadu sura hosi 21 marsu 2020 to’o 09 agostu 2021 hamutuk 11.579. Hosi horisehik mai ohin, teste ne’ebé Laboratóriu Nasionál Saúde halo hamutuk 168 PCR, ho detallu hanesan tuir-mai, Vijilánsia sentinela na’in-lima, rastreiu ba kontaktu ka Contact tracing  52,  Rastreiu Aleatóriu  ka Random Screening laiha, viájen sai-hosi serka sanitária hosi Dili79,  Viájen internasionál rua, Follow up iha kuarentena na’in 30.

Totál testes PCR ne’ebé halo horisehik 08 agostu iha munisípiu-sira seluk, RAEOA no HNGV hamutuk 139, ho detalla hanesan tuir-mai, Maubisse 36, Maliana laiha, Viqueque tolu, Suai 17, Baucau 43,  Ermera haat, RAEOA 28 no HNGV 28.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 09 agostu tuir sistema informasaun Saúde iha Ministériu Saúde, totál  kumulativu 1ª doze iha Dili (68,3%) no  totál  kumulativu 2ª doze  iha Dili (45,0%).

Ema ne’ebé simu ona vasina doze dahuluk iha Timor-Leste  (42,1%) no simu ona doze daruak (14,7%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 6,5 /100 mil abitante, enkuantu ba de’it munisípiu Ermera 20,1/100 mil abitante.

Iha semana ida ne’e, insidénsia iha munisípiu Dili  9,8/100 mil abitantes, tuir kedan  RAEOA  ho insidénsia 7,3/100 mil abitante, hafoin ho munisípiu Covalima ho insidénsia  6,7/100 mil abitante.

Ida-ne’e hatudu katak, insidénsia munisípiu Ermera nian maka a’as-liu, entaun  munisípiu tolu – Ermera, Dili, RAEOA  ho Covalima – mak iha risku bo’ot liu atu populasaun hetan da’et, no hada’et tutan virus SARS-CoV-2, iha komunidade nia le’et.

Iha 09 agostu 2021, izolamentu Vera Cruz halo tratamentu ba kazu detetadu na’in 30, iha área obstetrisia na’in-sia, no iha medisina interna na’in  19,  iha sirurjia na’in-rua. Iha obstetrisia na’in-sia kategoria kaman hotu.

Iha área medisina interna  na’in  19. Lima  kategoria grave (rua uza ventiladór)  na’in-tolu uza oksijéniu, na’in-haat kategoria  moderadu, na’in-sanulu kategoria kamán. Sira na’in-rua iha sirurjia kategoria kamán hotu.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tán maka sei baixa ho kategoria moderadu no grave.

Hakaarak informa ba públiku katak, rezultadu sekuensiasaun genómica amostra 20 hosi kazu pozitivu iha munisípiu Ermera, ne’ebé Laboratoriu Nasionál Saúde haruka iha loron  29 jullu de 2021 ba Peter’s Doherti Institute iha Melbourne, Australia, ho pedidu atu halo análize urjente, hetan ona resposta preliminár, iha loron  07 agostu 2021.

Rezultadu sekuensiasaun genómika hadutu katak, amostra hosi ema na’in  12, iha lineajen B.1.617.2 (Delta), variante ne’ebé preokupante, ka ‘’variant of concern’’.

Sira na’in 12 ne’e, balun hala’o izolamentu terapeútiku iha fasilidade ne’ebé Governu prepara, balun halo izolamentu terapeútiku domisiliár.

Rezultadu hirak-ne’e hatudu katak, variante preokupante Delta nakda’et ona iha komunidade Ermera nia le’et.

Ba populasaun iha Timor-Leste laran tomak, maski karik simu ona vasina, favór respeita nafatin regra prevensaun no ijiéne individuál, ne’ebé Governu hatu’ur ona, atu prevene moras COVID-19 da’et ba mai.

Regra sira-ne’e, mak hanesan uza máskara, fase liman beibeik ho sabaun ka dezinfetante ruma, evita kose liman ba matan, inus ho ibun bainhira kumprimenta-malu, la presiza ka’er-liman, bensa-liman, rei-malu ka haku’ak-malu, evita halibur-malu barak  hamri’ik ka tur do’ok hosi ema seluk, mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here