Komunidade kontinua simu vasina AstraZeneca iha Sentru Saúde Comoro, segunda (09/08/21). Imajen Tatoli/António Gonçalves.

DILI, 09 agostu 2021 (TATOLI)—Tuir buletín epidemiolójika, taxa insidénsia COVID-19 iha Timor-Leste (TL) tun iha semana ikus  6,1/100.000 populasaun, kompara ho semana kotuk  6,7/100.000 populasaun.

“Timor-Leste, durante loron hitu liu-bá hahú hosi 02 agostu to’o 08 agostu 2021, taxa insidénsia tun ba 6.1/100,000 populasaun  iha kada loron kompara ho kazu 6.7/100.000 populasaun kada loron iha periúdu relatóriu anteriór,” Buletín epidemiolójika, haktuir liuhosi komunikadu, segunda ne’e.

Notísia relevante:COVID-19: óbitu ida, pozitivu 50 no ativu 1.422

Dadus kona-bá variante COVID-19 iha TL ne’ebé relata iha sábadu 07 agostu 2021, Institutu Doherty iha Australia fornese ona rezultadu kompletu hosi sekuensiamentu genome ba amostra 12 ne’ebé mak koleta ona iha 27 jullu 2021 iha Ermera.

Amostra 12 ne’e pozitivu hotu ba COVID-19 nia variante Delta (B.1.617.2). Iha probabilidade bo’ot tebes katak, COVID-19 nia variante Delta ne’e mak maioria kauza ona kazu barak iha surtu COVID-19 nian ne’ebé akontese iha Ermera. Provavelmente COVID-19 nia variante Delta ne’e foin mak introdús resentemente iha TL.

Amostra husi komunidade hamutuk 266 ne’ebé haruka ona ba Australia hodi halo teste iha loron 14 fulan jullu 2021, ne’e la pozitivu ba COVID-19 nia variante Delta. Amostra hosi munisípiu sira seluk nian seidauk halo teste, desde loron 14 fulan jullu 2021. Númeru kazu ne’ebé mak aumenta iha Dili, Covalima no Oecusse ne’e bele mós tanba transmisaun hosi COVID-19 nia variante Delta iha komunidade.

Iha posibilidade katak variante ida ne’e sei bele espalla ba munisipiu hotu-hotu iha Timor-Leste. COVID-19 nia variante Delta ne’e mais infesiozu liu duké variante sira seluk.

Variante ne’e bele kauza moras todan no ema mate, liuliu ba ema sira ne’ebé seidauk simu vasina kompletu. Vasina AstraZeneca ho dose rua (2) hatudu ona provas atu redús risku ba moras COVID-19 grave, até 92%.

Taxa ba teste nia pozitividade durante semana kotuk, iha Laboratoriu Nasional Saúde (LNS) teste hosi Dili hamutuk 258/3,133) ka 8,2 % mak pozitivu kompara ho 4.1% iha periúdu relatóriu anteriór.

Iha Baucau, teste hamutuk 18/541 ka 3,3% mak pozitivu durante iha semana liubá kompara ho 4.8% iha periúdu relatóriu anteriór.

Iha Covalima, teste hamutuk 54/412 ka 13% mak pozitivu durante iha semana liubá. Iha Ermera, teste hamutuk 232/649 ka 36% mak pozitivu durante iha semana liubá kompara ho 34% iha periúdu relatóriu anteriór.

Teste maioria hala’o iha Laboratóriu Nasionál de Saúde. Iha Viqueque, teste hamutuk 22/190 ka 12% mak pozitivu durante iha semana liubá kompara ho 15% iha periúdu relatóriu anteriór.

Atualizasaun ba Vasinasaun kuaze vasina COVID-19 nia doze hamutuk 40.000 (AstraZeneca no Sinovax) mak administra ona iha TL, iha semana kotuk.

To’o iha 07 fulan agostu 2021, vasina COVID-19 nia doze primeiru hamutuk 315.746 mak administra ona, iha Timor-Leste, reprezenta 41.8% hosi populasaun ne’ebé elijível ho idade hosi tinan 18 ba leten.

Too ohin loron Timor-Leste rejista mate ho COVID-19 hamutuk 28.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here