Primeiru-Ministru, Taur Matan Ruak, lansa programa prémiu nasionál nutrisaun. iha salaun city 8 Has-laran, segunda (09/08). Imajen TATOLI/Egas Cristóvão

DILI, 09 agostu 2021 (TATOLI)–Primeiru-Ministru (PM), Taur Matan Ruak, halo lansamentu programa nasionál nutrisaun, ne’ebé implementa hosi Sekretariadu nasionál Scaling Up Nutrition  (SUN) Movement ne’ebé kolabora ho Komisaun Nasionál Serbisu Tékniku ba Nutrisaun Timor Leste (KONSSANTIL).

Prémiu nutrisaun ne’e ba kategoria suku, grupu feto, grupu to’os na’in, grupu joven no grupu suporta inan, ne’ebé kada kategoria manán-na’in I sei hetan osan $5.000, manán na’in II $3.000, manán na’in III $2.000.

Programa nasionál nutrisaun. Imajen/GPM

“Ho ksolok boot, ita lansa filafali programa ne’ebé ho intensaun sai fonte inspirasaun, enkoraja no estímula tebes sidadaun no komunidade alimentár ne’ebé informada, ativa, partisipativa no organizada liu, ho destake ba papel autoridade lokál, nune’e mós ba nesesidade atu envolve joven no devér inkluzaun hosi grupu femininu sira no hosi grupu portadór inkapasidade sira,” PM Taur hateten liuhosi diskursu iha salaun City 8, Has-laran, segunda ne’e.

Tuir PM, prémiu nasionál ne’e fó ezemplu di’ak ba prémiu prezidensiál nutrisaun, ne’ebé implementa ona durante nia mandatu entre tinan 2014 no tinan 2017, ne’ebé rezultadu no rekomendasaun di’ak mak nafatin orienta kontinuidade no alargamentu.

Xefe Ezekutivu dehan, debate ne’e sei kontribui ho loloos hodi hadi’a prosesu produsaun, distribuisaun no armazenamentu ai-han, hodi insentiva kurva dekrexente hosi taxa subnutrisaun nasionál, ne’ebé iha tinan 2010 afeta ba populasaun 58% no iha tinan 2020 kontinua afeta sidadaun hamutuk 48%, liuliu ba sira ne’ebé presiza liu ka karensiadu vulnerével no desfavoresidu liu.

“Prémiu nasionál nutrisaun lansa ho objetivu atu promove ezemplu no prátika di’ak internasionál, ne’ebé hatudu métodu avansadu liu, bele no tenke adapta ba realidade timor-oan, ne’ebé ita konsege hatudu ona propózitu hosi tinan 2014 to’o 2017, no ita bele halo propózitu, ne’ebé divulga filafali iha nível nasionál, ezemplu hosi grupu, aldeia ka suku di’ak liu, ne’ebé kontribui iha prátika seguransa alimentár nasionál nian,” PM akresenta.

Governu hakarak ninia sidadaun no komunidade bele konxiente ba devér no responsabilidade, atu apoia esforsu nasionál hodi halakon hamlaha no lisan ladi’ak kona-ba nutrisaun, hodi promove partisipasaun efetiva iha planu nasionál seguransa alimentár nian, ne’ebé foin lalais aprova ona hosi Governu no akompaña inisiativa hosi Sekretáriu-Jerál Organizasaun Nasaun Unida (ONU), ne’ebé iha esforsu globál boot hodi hadi’a sistema ai-han mundiál.

“Ita hakarak promove inovasaun, kreatividade no empreendedorizmu, ne’ebé envolve parseiru dezenvolvimentu iha implementasaun planu no medida oioin, hodi kombate hamlaha no sub-nutrisaun, inklui tékniku, péritu, espesialista ka estudiozu sira ba nesesidade atu debate iha diálogu nasionál ho tema sira ‘hahán saudável no belun  ambiente, iha espíritu komunidade alimentár ne’ebé loos,” PM hatutan.

Biban ne’e, Taur Matan Ruak kongratula parseiru sosiedade sivil hotu, liuliu empreza kiik ka mikro empreza ne’ebé partisipa iha programa Cesta Bázika no grupu joven, feto, no lokál sira, ne’ebé maka manán ona iha edisaun anteriór prémiu nasionál nutrisaun, ne’ebé sira-nia ezemplu no prezensa hanesan onra tebes ba Governu.

PM agradese ba doadór no parseiru internasionál hotu, ne’ebé fó apoiu no enkoraja Governu hasoru futuru ho esperansa renovada iha dezenvolvimentu sistema nasionál alimentasaun, ne’ebé sustentável, justu no ekuitativu liu, iha kapasidade hodi redús desperdísiu ai-han no konkretiza ita-nia objetivu hotu.

“Ba Timor-Leste ida ho zero hamlaha, ba país ne’ebé saudável liu, ho ema sira ne’ebé iha nutrisaun di’ak, ba mundu ida ne’ebé justu, ekuitativu no ho sistema alimentasaun ida ne’ebé di’ak,” nia subliña.

Prémiu nasionál ne’e konta ho apoiu finanseiru jenerozu ho valór $100.000  hosi programa alimentasaun mundiál (WFP, sigla inglés) no ho apoiu tékniku hosi parseiru dezenvolvimentu nasionál no internasionál sira, liuliu hosi Fundu Nasaun Unida ba Infánsia (UNICEF) no hosi Departamentu Asuntu Externu Austrália (DFAT).

Kontinuidade ne’ebé interrompe iha tinan 2017, maibé ninia determinasaun no empeñu kontinua hosi Governu ne’ebé iha imperativu kumprimentu ba ninia programa hodi alkansa objetivu nasionál boot atu halakon hamlaha no sub-nutrisaun ne’ebé prevee ona iha Planu Estratéjiku Dezenvolvimentu Nasionál (PEDN) no iha kompromisu sira ne’ebé asume hosi país ba Objetivu Dezenvolvimentu Sustentável (ODS).

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here