UPF asegura pontu entrada Batugade, Bobonaro. Imajen Tatoli/Eugénio Pereira.

DILI, 09 agostu 2021 (TATOLI)—Polísia Nasionál Timor-Leste (PNTL) liuhosi Unidade Batallaun Orden Públika (BOP) no  Kompañia  Operasaun Espesiál (COE sígla portugés), detein tán  sidadaun na’in-rua, tanba tenta hakat ilegál hosi fronteira terrestre ba Indonézia.

Tuir relatóriu polísia, joven ida ho inisiál OdA  hosi  aldeia Atus, suku  Gildapil, munisípiu Bobonaro nu’udár membru Grupu Arte Marsiál (GAM) hakat ilegál ba Indonézia iha 02 jullu tinan ne’e, atu ba tuir ezame sa’e sintu, ne’ebé  lori mós ema na’in-lima.

Notísia relevante:PNTL kaptura sidadaun 11 tenta hakat ilegál ba Atambua

Sidadaun OdA  mak fila uluk mai territóriu TL iha 06 agostu  no nia maluk sira-seluk  daudaun ne’e sei iha hela Indonézia.

“Orientasaun Komandu jerál mai iha komandu UEP, hodi reforsa liña fronteira atu koloka tán membru COE ho mós  BOP  halo vizilánsia apoia UPF. Nune’e, ohin dadeer detein tán joven mane ne’e iha área fronteira ne’ebé fasilita ema na’in-lima ba sa’e sintu iha Indonézia,” Komandante Unidade Espesiál Polísia (UEP), Superintendente Xefe Polísia Orlando Gomes, hateten ba jornalista-sira iha knaar fatin Bairru-Pité, segunda ne’e.

Iha 08 agostu tuku 13:00 otl, halo detensaun ba membru GAM na’in-ida iha suku Memo, hetan mós evidénsia hanesan atributu arte marsiál, ne’ebe fasilita mós membru na’in-lima ba tuir ezame arte marsiál iha Indonézia.

Enkuantu, iha 07 agostu BOP no COE  detein ema na’in 11 iha suku Saburai hamutuk ho sidadaun Indonézia ida ne’ebé mak atu hakat fronteira ho ilegál ba Indonézia.

Daudaun sidadaun hirak-ne’e entrega ona ba komandu PNTL munisípiu  Bobonaro, hodi kontinua halo prosesu investigasaun atu bele prosesa tuir lei ne’ebé vigora.

Jornalista : Nelson de Sousa

Editór       : Cipriano Colo

HAKEREK NO HATÁN

Please enter your comment!
Please enter your name here