Sidadaun-sira ne'ebé mak hetan kapturasaun hosi PNTL, iha liña fronteira suku Saburai, postu administrativu Maliana, Munisipiu Bobonaro. Imajen PNTL.

BOBONARO, 07 agostu 2021 (TATOLI)—Polísia Nasionál Timor-Leste (PNTL), liuhosi Unidade Espesiál Polísia (UEP) detein joven Timoroan na’in-sanulu no sidadaun Indonézia na’in-ida ne’ebé tenta hakat ilegál ba Atambua, Nusa Tenggara Timur (NTT).

Membru UEP detein sidadaun hirak-ne’e, iha sábadu (07/08) tuku 03:00 madrugada, iha área suku Saburai, postu administrativu Maliana, munisípiu Bobonaro.

Notísia relevante:UPF kaptura ema na’in-hitu hakat ilegál ba Indonézia

“COE ho BOP halo vizilánsia iha liña fronteira, detein sidadaun balun mesak joven de’it no ida hosi estranjeiru. Polisia lori kedan mai entrega iha Komandu PNTL Bobonaro hodi halo identifikasaun,” Komandante PNTL Bobonaro, Superintendente, Antoninho Mauluta, informa ba jornalista-sira, iha komandu munisípiu, sábadu ne’e.

Ema hirak ne’e, na’in-sanulu orijen hosi suku Saburai, no na’in-ida sidadaun Indonézia ne’ebé mai hare nia-oan moras iha suku Saburai.

Sira na’in 11  ne’e, na’in-hitu detein iha área Pipgaluhan, na’in-tolu iha liña fronteira Saburai.

Antoninho Mauluta  fó-sai katak, deklarasaun ne’ebé sidadaun hirak-ne’e aprezenta, iha ema na’in-ida mak fasilita-sira hakat fronteira, na’in-rua mak lori manu kompletu akompaña sidadaun estranjeiru ne’e atu ba tuir ezame arte marsiál iha Atambua.

“Maibé, sidadaun hirak-ne’e, la konsege ultrapasa tanba UEP halo kedan detensaun no entrega  ba komandu Bobonaro hodi halo investigasaun,” nia konta-tuir.

Nia dehan, oras ne’e daudaun parte investigasaun halo hela prosesu hodi foti deklarasaun, maibé sei la mantein ho sira-nia deklarasaun ida-ne’e, tanba ba oin sei kontinua dezenvolve investigasaun no buka informasaun ho evidénsia balun.

Tuir informasaun sidadaun hira-ne’e fasilitadu hosi oknum membru PNTL iha fronteira, maibé Antoninho Mauluta seidauk rona informasaun klara, no husu ba públiku bainhira hetan ka hatene kona-bá informasaun ne’e, bele aprezenta keixa ba komandu Bobonaro atu loke prosesu.

Tuir planu, bainhira konklui investigasaun, Komandu PNTL Bobonaro sei aprezenta relatóriu ba Komandu Jerál, nune’e bele submete fali ba Ministériu Públiku hodi loke prosesu tuir lei.

Relasiona ho situasaun ne’e, Komandu Munisípiu Bobonaro hamutuk ho ekipa konjunta aperta liu-tán seguransa iha área fronteira.

Jornalista : Sérgio da Cruz

Editór       : Cipriano Colo

1 KOMENTÁRIU

HAKEREK NO HATÁN

Please enter your comment!
Please enter your name here