Diretór STAE Munisípiu Viqueque, Humberto Fernandes. Imajen Tatoli/Vitorino Lopes da Costa.

VIQUEQUE, 09 agostu (TATOLI)—Serbisu Tékniku Administrasaun Eleitorál (STAE) munisípiu Viqueque, hahú hala’o resensiamentu eleitorál iha postu administrativu Ossu no Uatulari hodi halo atualizasaun ba dadus eletorál  ne’ebé sei partisipa iha eleisaun Prezidensiál 2022.

“Ohin, iha postu administrativu Uatularu no Ossu hala’o ona iha sesta liu ba ita rejistu eleitór hitu. Lansamentu resensiamentu ne’e iha 01 jullu 2021, maibé destaka de’it iha Viqueque tanba ekipamentu ba postu sira laiha. Nune’e, parte lojistíka nasionál distribui ona ekipamentu resensiamentu kompletu ita mós distribui ona ba postu rua ne’e,” Diretór STAE munisípiu Viqueque, Humberto Fernandes, hateten ba jornalista Agência Tatoli, iha serbisu fatin, segunda ne’e.

Notísia relevante:CNE-STAE RAEOA lansa resensiamentu eleitorál ba preparasaun eleisaun prezidensiál

Funsionáriu STAE ne’ebé destakadu iha sentru resensiamentu eletorál kompostu hosi pontu fokál, asistente operadór no operadór tékniku.

Kona-bá postu administrativu rua hanesan Lacluta no Uatucarbau seidauk hahú, maibé Humberto Fernandes  husu populasaun ne’ebé halo eletorál urjente bele hakbesik-an ba postu administrativu rua ne’ebé loke ona.

Alende ne’e, kona-bá ema ho defisiénsia-sira ne’ebé mak labele la’o, família-sira tenke koordena ho autoridade suku no funsionáriu STAE iha postu, nune’e funsionáriu-sira ba direta iha rezidénsia hodi halo sira-nia eleitorál.

Hahú lansamentu iha 01 jullu 2021, rejista ona eleitór hamutuk 262, atualiza eleitór 53.

Resensiamentu iha postu administrative rua ne’e hahú halo atendimentu iha segunda to’o sesta, tuku 08:00 to’o 12:00 no kontinua iha 14:00 to’o 17:00 otl.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here