Pesoál saúde-sira halo hela atendimentu ba populasaun Bobonaro, ne'ebé ho voluntariamente mai simu vasina iha merkadu Maliana, sábadu (07/08). Imajen Tatoli/Sérgio da Cruz.

BOBONARO, 07 agostu 2021 (TATOLI)—Serbisu saúde munisípiu Bobonaro, instala postu vasinasaun tolu, iha merkadu Maliana, hodi fasilita populasaun ne’ebé ho voluntariamente hakarak simu vasina COVID-19.

“Ohin komisaun interministeriál halo kampaña atu mobiliza di’ak liu tan komunidade.Tanba ne’e, ita loke postu tolu atu akomoda ema ne’ebé hakarak mai simu vasina,” Diretór serbisu saúde munisípiu Bobonaro, João Barreto Cardoso, hateten ba Jornalista-sira, iha merkadu Maliana, sábadu ne’e.

Notísia relevante:MS Observa konstrusaun armazen SAMES Bobonaro

Diretór ne’e esplika, durante implementasaun vasina iha merkadu ne’e, komunidade  barak mak voluntariamente mai rasik simu vasina, tanba hetan informasaun hosi autoridade lokál, Ofisiál Polísia Suku (OPS), maski la aplika sistema obrigatóriu.

Kampaña ne’e sei hala’o durante loron sanulu ne’ebé sei remata iha 17 agostu, no agora vasina sei sufisiente sei iha doze rihun lima resin.

Diretor ne’e mós enkoraza populasaun iha munisipiu ne’e atu hakbesik-an hodi simu vasina iha postu vasinasaun ne’ebé estabele ona.

Komunidade, Natália de Fátima, hateten durante ne’e seidauk simu vasina tanba la hetan esplikasaun klara hosi parte saúde, maibé agora bele simu ona, tanba kompriende didi’ak ona kona-bá vantajen hosi vasina ne’e, hafoin hetan esplikasaun hosi parte saúde iha kampaña ne’e.

Tuir dadus, munisípiu Bobonaro konsege oferese ona vasina ba ema na’in rihun 15-resin, klasifika ba doze dahuluk rihun ida-resin no doze daruak rihun 14-resin.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here