Komunidade simu vasina AstraZeneca iha Sentru Saúde Formoza, Dili, kuarta (04/08). Imajen Tatoli/Francisco Sony.

DILI, 07 agostu 2021 (TATOLI)— Sala Situasaun, Sentru Integradu Jestaun Krize (SIJK), deteta kazu pozitivu foun 89, rekoperadu 19 no totál kazu ativu 1.335.

“Kazu detetatu ohin 89 iha Dili 35, Ermera 32 no munisípiu seluk hamutuk 22, kompostu hosi mane 29 no feto 60,” Koordenadór Forsa-Tarefa ba Prevensaun no Mitigasaun Surtu COVID-19 iha Timor-Leste, Rui Maria de Araújo, hateten liuhosi komunikadu sábadu ne’e.

Notísia relevante:COVID-19, pozitivu 161 no ativu 1.265

Hosi totál kazu detetadu foun ohin, kazus 11 ka 12,3% mak sintomátiku (hatudu sintomas). Totál kazu konfirmadu kumulativu ohin sura hosi 21 Marsu 2020 hamutuk 11.475.

Hosi horiseik mai ohin, hamutuk hotu Laboratóriu Nasionál Saúde halo 587 teste PCR iha Dili, ho detalla hanesan tuir-mai, Vijilánsia sentinela 35, Rastreiu ba kontaktu ka Contact tracing 117,  Rastreiu Aleatóriu ka Random Screening 100, Viajen sai hosi serka sanitária Munisipiu Dili 298, Viajen internasionál 23,  Follow up iha quarentena 14.

Totál testes PCR ne’ebé halo horiseik iha Munisipiu sira seluk, REAOA no HNGV, hamutuk 424, ho detalle hanesan tuir-mai, Baucau 120, Ermera 1, Maliana 6, Maubisse 40,  RAEOA 49,  Suai 99, Viqueque 56,  HNGV 53.

Atu bele hatene surtu ida ninia evolusaun, no mós surtu ne’e aumenta ka diminui, indikadór ida ne’ebé matenek-na’in epidemiolojia sira uza, maka insidénsia.

Konvensionalmente insidénsia sukat totál kazu foun, kada loron, pur 100 mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron 7 ikus maka 6,3/100 mil abitante, enkuantu ba de’it Munisípiu Ermera 24,9/100 mil abitante.

Ohin, insidénsia iha Dili 8,0/100 mil abitante, tuir kedan Munisípiu Covalima ho insidénsia 7,1/100 mil abitante, no RAEOA ho insidénsia 5,0/100 mil abitante.

Ida-ne’e hatudu katak, insidénsia Munisipiu Ermera nian maka nafatin a’as-liu iha Timor-Leste laran tomak, Munisipiu tolu hanesan Ermera, Dili, Covalima ho RAEOA mak iha risku bo’ot liu atu populasaun hetan da’et, no hada’et tutan virus SARS-CoV-2, iha komunidade nia le’et.

Informasaun hosi izolamentu

Ohin, izolamentu Vera Cruz halo tratamentu ba kazu detetadu na’in 22. Iha área obstetrisia na’in-sia, iha medisina interna na’in 11, iha sirurjia na’in-rua. Sira na’in-sia iha obstetrisia, kategoria leve (mild) hotu.

Hosi sira na’in 11 iha medisina interna, ida kategoria grave (uza ventiladór), tolu kategoria moderadu, hitu kategoria leve (mild). Sira na’in-rua iha sirurjia, kategoria leve (mild) hotu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here