iklan

NASIONÁL, COVID-19, DILI, HEADLINE, MUNISÍPIU, SAÚDE

COVID-19, pozitivu 161 no ativu 1.265

COVID-19, pozitivu 161 no ativu 1.265

Pesoál saúde iha Sentru Saúde Formoza, prepara hela vasina AstraZeneca, kuarta (04/08). Imajen TATOLI/Francisco Sony

DILI, 06 agostu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu pozitivu 161, rekoperadu 56 no kazu ativu 1.265.

“Kazu foun 161 maihosi Dili 63, Ermera 69 no munisípiu seluk 29 kompostu hosi mane 94 no feto 67,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, sesta ne’e.

Notísia relevante:COVID-19, pozitivu 80 no ativu 1.160

Hosi totál kazu detetadu foun ohin, ho idade 12 mai karaik na’in-neen, entre tinan 12-59 na’in 147 (91,3%), idade 60 mai karaik na’in-ualu. Hosi kazu detetadu foun ohin 25 ka 15,5% sintomátiku (hatudu sintomas).

Kumulativu kazu konfirmadu sura hosi 21 marsu 2020 to’o 06 agostu 2021 hamutuk 11.386. Hosi horisehik mai ohin, teste ne’ebé Laboratóriu Nasionál Saúde halo hamutuk 818 PCR, ho detallu hanesan tuir-mai, Vijilánsia sentinela 74, rastreiu ba kontaktu ka Contact tracing 249, Rastreiu aleatóriu ka Random Screening nain 18, viájen sai-hosi serka sanitária hosi Dili 440, Viájen internasionál 23, Follow up iha kuarentena na’in 14.

Totál testes PCR ne’ebé halo horisehik 05 agostu iha munisípiu-sira seluk, RAEOA no HNGV hamutuk 257 ho detalla hanesan tuir-mai, Maubisse 45, Maliana 37, Viqueque hitu, Suai 53, Baucau 37,  Ermera haat, RAEOA 30 no HNGV 47.

Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 06 agostu tuir sistema informasaun Saúde iha Ministériu Saúde, totál kumulativu 1ª doze iha Dili (67,5%) no totál kumulativu 2ª doze  iha Dili (43,7%).

Ema ne’ebé simu ona vasina doze dahuluk iha Timor-Leste (41,2%) no simu ona doze daruak (14,3%).

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia-nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 7,0 /100 mil abitante, enkuantu ba de’it munisípiu Ermera 33,2/100 mil abitantes.

Iha semana ida-ne’e, insidénsia iha munisípiu Dili  8,0/100 mil abitantes, tuir kedan ho munisípiu Covalima ho insidensia  7,0/100 mil abitantes.

Ida-ne’e hatudu katak, insidénsia munisípiu Ermera nian maka a’as-liu, entaun  munisípiu tolu – Ermera, Dili, Covalima mak iha risku bo’ot liu atu populasaun hetan da’et, no hada’et tutan virus SARS-CoV-2, iha komunidade nia le’et.

Iha 06 agostu 2021, izolamentu Vera Cruz halo tratamentu ba kazu detetadu na’in 18, iha área obstetrisia na’in-ualu no iha medisina interna na’in-ualu,  iha sirurjia na’in-rua.

Iha obstetrisia na’in-ualu kategoria kaman hotu. Iha área medisina interna na’in-ualu. Ida kategoria grave (uza ventiladór)  na’in-tolu kategoria moderadu, na’in-haat kategoria  kaman. Sira na’in-rua iha sirurjia kategoria kamán.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tán mak sei baixa ho kategoria moderadu no grave.

Aproveita fó hanoin ba públiku katak, Konsellu Ministru deside ona atu impoin serka sanitária ba munisípiu Ermera, no konfinamentu domisiliáriu jerál ba postu administrativu Ermera ho Railaku.

Informa mós ba populasaun tomak katak, ema ne’ebé simu ona vasina doze daruak hasoru virus SARS-CoV-2 – naran vasina ida, hosi hirak ne’ebé rekoñesidu hosi Organizasaun Mundiál Saúde (OMS)- bele ona sirkula livremente tama ka sai serka sanitária, la presiza hetan autorizasaun esepsionál hosi Diretór Centro Integrado Gestão de Crises no  bele mós sirkula livremente iha fatin hirak ne’ebé Governu deside atu impoin konfinamentu domisiliáriu jerál. Presiza de’it hatudu provas kona-bá hetan ona vasinasaun kompletu.

Jornalista: Felicidade Ximenes

Editór: Cipriano Colo

iklan
iklan

Leave a Reply

iklan
error: Content is protected !!