Prezidente Parlamentu Nasionál, Aniceto Longuinhos Guterres Lopes, observa hela esketsa futuru edifísiu própriu Parlamentu Nasional. Esketsa dezeña ne’e hala’o iha lejislatura dahuluk nia tempu. Imajen/Evaristo Soares Martins.

DILI, 06 agostu 2021 (TATOLI)—Parlamentu Nasionál (PN) lideradu Deputadu Aniceto Longuinhos Guterres Lopes, sei kontinua buka fatin atu harii edifísu própriu tanba uma fukun atuál laiha ona espasu.

Prezidente Parlamentu Nasionál, sesta ne’e preside reuniaun lider bankada parlamentár hodi diskute asuntu atu harii edifísiu própriu, hosi parte tékniku sira halo ona aprezentasaun kona-ba fatin sira-ne’ebé posibilidade atu harii.

“Ohin, tékniku sira halo aprezentasaun kona-ba fatin, depois kona-ba oráriu kontrusaun ne’e sei hahú hosi fulan-agostu 2021 to’o 2023. Maibé fatin muda dala-tolu ona, primeiru iha Tasi Tolu, Hudi-Laran no oras ne’e ami diskute atu harii iha Kaikoli maibé seidauk fiksu,” Sekretária Meza Komisaun Permanente, Deputada Domingas dos Santos, ba jornalista sira iha uma fukun.

Nia hatutan fatin tolu ne’e seidauk fiksu, tanba iha estudu barak atubele identifika loloos fatin, provizoriumente iha rai ektare ualu iha Kaikoli maibé seidauk fiksu, tanba sei haree kondisaun rai no nesesidade sira seluk.

Nia dehan semana oin tékniku sira sei halo aprezentasaun iha Konsellu Administrasaun kona-ba fatin ne’ebé atu harii edifísiu própriu ba PN ne’e.

Iha loron 30 abríl 2021 liubá, Sekretáriu Jerál PN, Adelino Afonso Gomes, fó-sai prosesu harii edifísiu própriu PN nian tama ona iha faze estudu viabilidade no dezeñu.

Nia hatutan, orsamentu privativu prevee millaun $3 maibé iha orsamentu retifikativu foin lalais sofre alterasaun millaun $2,5 entaun verba kapitál kapitál dezenvolvimentu hosi PN nian hela de’it rihun $500.

Maibé nia subliña, faze estudu viabilidade no dezeñu prevé ona iha Fundu Infraestrutura ho rihun $240.

“Edifísiu Parlamentu Nasionál agora daudaun iha faze estudu no dezeñu, estudu no dezeñu ne’e osan iha Fundu Infraestrutura ne’ebé orsamentu tiha ona dezde tinan rua liubá, hamutuk rihun $240, osan ne’e sufisiente halo faze preliminária estudu no dezeñu ne’e,” nia informa ba jornalista sira.

Entretantu iha loron 19 agostu 2020 liubá, Prezidente PN, Deputadu Aniceto Longuinhos Guterres Lopes, hateten vizaun atu harii edifísiu própriu PN inklui rezidénsia ba deputadu sira tanba kada lejizlatura gastu ba subsídiu boot tebes.

“To’o agora deputadu ida simu $450 ba alojamentu kada fulan, tinan ida deputadu ida hetan $5.400, tinan ida deputadu 65 hetan $351.000,00. Iha  lejizlatura ida (tinan 5) Estadu gasta S1.755.000,00 ba dei’t alojamentu. Bainhira harii duni redús ka elimina totál orsamentu ida-ne’e entaun presiza duni rezidénsia ba deputadu besik kedas sede Parlamentu Nasionál. Kestaun seluk mak efikásia tempu servisu,” Prezidente PN argumenta iha momentu ne’ebá.

Nia afirma, públiku hatene ona kona-ba frakeza kumprimentu oras servisu deputadu sira. Razaun barak liu kona- ba inkumprimentu oras servisu ne’e mak distánsia hela-fatin ho sede PN ne’ebé dook ba deputadu lubuk ida.

Deputadu Aniceto Guterres subliña, deputadu sira presiza kumprimenta rigorozu oras servisu kondisiona ho fatin no fasilidade servisu ne’ebé adekuadu sei produz rezultadu ne’ebé ho kualidade di’ak liután iha futuru.

“Ne’e duni sede Parlamentu Nasionál, rezidénsia ba deputadu, fasilidade no kondisaun adisionál seluk ne’ebé relevante presiza hanoin no tetu agora para lori ita hotu kontribui ba forma ita-nia Parlamentu Nasionál ho deputadu ne’ebé dezempeña servisu ho kualidade di’ak liután iha future,” nia katak.

Notísia relevante: Prosesu harii edifísiu própriu PN tama iha faze estudu no dezeñu

Jornalista       : Evaristo Soares Martins

Editór             : Cancio Ximenes

HAKEREK NO HATÁN

Please enter your comment!
Please enter your name here