Sentru saúde Cailaco (26/07). Imajen Tatoli/Sérgio da Cruz.

BOBONARO, 02 agostu 2021 (TATOLI)—Populasaun 46.179 iha munisípiu Bobonaro, ho idade 18 ba leten seidauk simu vasina kontra COVID-19.

Númeru ne’e, maihosi postu administrativu Maliana hamutuk na’in 14.740, Bobonaru na’in 11.546, Loloto’e 4.048, Cailaco 4.180, Balibo 7.193 no Atabae na’in 4.492.

Notísia relevante:Hilária de Jesus hakotu-iis hafoin simu vasina AstraZeneca

“Na’in 12.351 mak simu ona vasina AstraZeneca doze dahuluk no daruak ho totál 21,8%,” Diretór Jerál Korporativu Ministériu Saúde (MS), Marcelo Amaral, hateten ba jornalista-sira, iha Kámara Dioseze Maliana, suku Lahomea, segunda ne’e.

To’o segunda 02 agostu, taxa kobertura vasinasaun iha munisípiu Bobonaro, foin mak to’o 21,8%, nune’e  MS liuhosi Diresaun serbisu korporativa, hala’o enkontru ho autoridade munisipál, liña ministeriál, atu hasae taxa kobertura vasina tuir alvu MS, populasaun Bobonaro ho idade 18 ba leten hamutuk 56.744 tenke kompleta vasina.

Diretor ne’e esplika, Governu sei apoia transporte operasionál hitu ba ekipa liña frente iha postu administrativu hitu, no prepara orsamentu opersionál ba autoridade lokál na’in 50, nune’e funsionamentu serbisu iha baze bele la’o ho diak, hodi bele aselera kobertura vasinasaun.

“Ami prepara hela mapamentu, depois halo uluk sosializasaun, advokasia ba komunidade, nune’e xefe suku mak bele mobiliza komunidade mai simu vasina iha sentru vasinasaun,” nia esplika.

Nune’e mós sekretáriu autoridade munisipál Bobonaro, Júlio Caero, husu pesoál saúde no autoridade lokál-sira, atu kontinua esforsu, serbisu makás, nune’e bele convense komunidade mai simu vasina.

Biban ne’e, autoridade lokál-sira mós rekoñese númeru kobertura iha munisipiu ne’e menus, tanba akotesimentu iha Lour, Inan-faluk Hilária de Jesus hakotu-iis hafoin simu vasina AstraZeneca iha 30 juñu.

“Ami sujere diak liu, Governu halo uluk sosializasaun kle’an, tanba komunidade barak mak laiha koñesimentu Kona-bá vasina ne’e,” Xefe Suku Kolimau, Arménio Guterres Moniz, sujere.

Planu mikro ne’ebé diresaun serbisu korporativa MS prepara atu aselera implementasaun vasina iha munisípiu Bobonaro, postu administrativu Maliana durante loron sanulu tenke fó vasina, loron ida ema na’in 442, Bobonaro 776, Balibo 375, Lolotoe 216, Atabae 414 no Cailaco 209 mak foin bele atinje tarjetu.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here