Diretór Jerál DNRN, Crisogno da Costa Neto. Imajen Tatoli/Domingos Piedade.

DILI, 06 agostu 2021 (TATOLI)—Ministériu Justisa (MJ), liuhosi Diresaun Jerál Serbisu Rejistu Notariadu (DNRN), simu pedidu inskrisaun hosi partidu foun, Partidu Unidade Dezenvolvimentu Nasionál (PUDN).

“Ita simu despaixu hosi Ministru Justisa atu hato’o rekerimentu nune’e halo verifikasaun ba partidu foun PUDN,” Diretór Jerál DNRN, Crisogno da Costa, hateten ba jornalista Agência Tatoli, sesta ne’e.

Notísia relevante:Ministru Justisa indefere diretamente kandidatu Partidu Os Verdes  

Nia dehan, kandidatu partidu ne’e foin hatama dokumentu no estatutu partidu, maibé dokumentu seluk seida’uk hatama.

Ekipa hosi kandidatu partidu  mós halo ona konsultasaun ho diresaun no semana oin hahú kompleta dokumentu ba serbisu notariadu.

Diretór ne’e esplika, tuir lei, primeira alterasaun partidu polítiku númeru 2/2016 iha artigu 13 nu’udár rekezitu ba partidu foun tenke kumpre dokumentu válidu-sira, hodi hatama ho númeru apoiante rihun 20, emblema, Bandeira no programa polítiku.

Nune’e, konservadór notariadu halo autentikasaun ba dokuemntu hotu-hotu, sei haruka fila-fali ba Ministru Justisa atu enkamiña ba Tribunál Rekursu (TR), sei haree fila-fali tán, bainhira prienxe ona rekezitu sei hetan legalidade atu rejistu, nune’e bele kompete iha eleisaun tuir-mai.

Kona-bá partidu foun haat ne’ebé antes ne’e TR indefere hanesan partidu Os Verdes, Fitun, Patifor, Partidu Dezenvolvimentu Sosiál, Crisogno da Costa, dehan ida-ne’e sira bele kompleta fila-fali dokumentu ne’ebé TR husu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here