Diretór Jerál DNRN, Crisogno da Costa Neto. Imajen Tatoli/Domingos Piedade.

DILI, 16 jullu 2021 (TATOLI)—Ministru Justisa (MJ), Manuel Cárceres da Costa, indefere diretamente ba kandidatu partidu polítiku Os Verdes de Timor tanba seidauk kumpre notifikasaun hosi Tribunál Rekursu (TR) kona-ba rekizitu inskrisaun.

Notísia Relevantes: Partidu OS Verdes ho Fitun la prenxe rekizitu

Diretór Jerál Servisu Rejistu no Notariadu hosi Ministériu Justisa, Crisogno da Costa Neto, haktuir kandidatu partidu polítiku foun haat (4) kompostu Partidu Timor Forte (PATIFOR), Os Verdes de Timor, Fitun no Partidu Dezenvolvimentu Sosiál (PDS) halo inkrisaun iha fulan-dezembru 2020, nune’e Ministériu Justisa enkamiña ba Tribunál Rekursu (TR).

Maibé iha fulan-janeiru 2021, Tribunál Rekursu hato’o notifikasaun indefere kandidatu partidu haat ne’e tanba seidauk prenxe Lei Partidu Polítiku númeru 2/2016, 3 fevereiru.

“Indefere diritamente ne’e ba kandidatu partidu Os Vesdes ne’e ho razaun seidauk halo-tuir notifikasaun Tribunál Rekursu nian,” Crisogno da Costa Neto, informa ba jornalista sira, iha nia kna’ar-fatin, Bebora, sesta ne’e.

Tribunál Rekursu halo indeferimentu tanba kandidatu partidu balun emblema laloos, númeru apoiante hosi munisípiu seidauk to’o, balun lista asinatura ho ema apoiante ne’ebé hanehan liman la separa maibé tau hamutuk de’it no balun estatutu laloos.

Nia subliña, kandidatu partidu haat ne’e sira-nia apoiante liu rihun rua-nulu (20.000-resin) ho dokumentu kartaun eleitorál apoiante nian maibé la komprova ho apoiante sira-nia identifikasaun sivíl.

Hafoin Tribunál Rekursu indefere inkrisaun kandidatu partidu foun haat ne’e, Os Verdes de Timor mak halo fali re-inkrisaun ba notariadu maibé nafatin la kumpre notifikasaun hosi Tribunál Rekursu, nune’e Ministru Justisa, Manuel Cárceres da Costa indefere diretamente.

Ministru Justisa indefere diretamente re-inskrisaun kandidatu partidu Os Verdes de Timor iha loron 11 juñu 2021 no akordaun Tribunál Rekursu nian sai iha loron 01 jullu 2021.

Ezemplu, nia dehan, se partidu polítiku rekolla kartaun eleitorál to’o rihun 20 tuir lei partidu polítiku maibé tenke komprova ho númeru identifikasaun sivíl.

“Númeru identifikasaun sivíl mak Billete Identidade (BI) mak seidauk iha karik, bele sédula pesoál, bele pasaporte, bele sertidaun moris (Sertidaun RDTL). Se ne’e mós laiha, entaun sertidaun batizmu mós di’ak. Se ida-ne’e laiha tán, entaun sertidaun kazamentu mós di’ak. Ida-ne’e kandidatu partidu foun la prenxe inklui Os Verdes de Timor,” nia haktuir.

Kandidatu partidu foun seluk hanesan PATIFOR, Fitun no Partidu Dezenvolvimentu Sosiál (PDS) ne’e hafoin Tribunál Rekursu indefere no to’o agora seidauk halo re-inskrisaun.

“Parese sira haree Os Verdes indefere diretamente hosi Ministru Justisa entaun sira la mai to’o agora tanba sira tenke prenxe notifikasaun hosi Tribunál Rekursu nian. Tanba, partidu ida atu hetan personalidade iha Tribunál Rekursu, entaun Tribunál Rekursu notifika tenke halo-tuir,” nia fó hanoin.

Hafoin Ministru Justisa indefere, kandidatu partidu Os Verdes halo rekursu ba Tribunál Rekursu nune’e akordaun sai iha loron 01 jullu 2021 hatudu katak desizaun Ministru Justisa, Manuel Cárceres da Costa nian loos, entaun  kandidatu partidu Os Verdes de Timor tenke halo rekolla fali apoiante idak-idak sira-nia identifikasaun sivíl.

Diretór Crisogno fó-sai katak, kandidatu partidu foun haat inklui Os Verdes de Timor sei iha tempu tanba eleisaun parlamentár sei dook.

Iha kandidatu partidu foun seluk hanesan ASDT, Aliansa Nasionál Demokrátika (AND) husu ona informasaun ba dirasaun nasionál maibé seidauk formalmente atu halo inskrisaun.

“Ha’u fó hanoin ba kandidatu partidu polítiku sira esforsa kumpre Lei Partidu Polítiku númeru 2/2016, 3 fevereiru nian, nune’e bele harii partidu foun,” nia dehan.

Lei partidu polítiku, lei númeru 2/2016, 3 fevereiru, primeira alterasaun ba lei númeru 3/2004 14 abríl, Ministériu Justisa, liuhosi Diresaun Jerál Servisu Rejistu Notariadu ninia kna’ar mak atu halo autentikasaun ba dokumentu pedidu inskrisaun partidu foun sira.

Ezemplu, partidu ida iha apoiante 20.000, mai ho kartaun eleitorál parte Notáriu autentika hodi tau karimbu bainhira identifika kartaun ruma iha duplikasaun no partidu sira ninia apoiante iha kada munisípiu la to’o 1.000, ida-ne’e sei rekomenda de’it ba Tribunál Rekursu (TR) mak sei deside.

Jornalista : Evaristo Soares Martins

Editór       : Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here