Prezidente Repúblika,Francisco Guterres Lú Olo. Imajen Tatoli/António Gonçalves

DILI, 20 maiu 2020 (TATOLI)–Prezidente Repúblika (PR), Francisco Guterres “Lú Olo”, preokupa ho fundu mina rai ne’ebé iha fulan haat ikus lakon reseita liu  millaun $840, kauza hosi moras surtu Coronavirus (COVID-19) ne’ebé hapara atividade ekonómika.

Preokupasaun ne’e, xefe estdu espresa liuhosi mensajen komemorasaun Loron Restaurasaun Independénsia ba dala-18, iha Palásiu Prezidensiál Nicolau Lobato, Bairru Pité, Dili.

Xefe estadu heteten, moras COVID-19 de’it lori ona konsekuénsia barak no boot ba ekonomia mundiál no afeta umanidade tomak nia moris, iha ne’ebé folin mina rai no gás sei ki’ik nafatin no sei la hanesan uluk ona.

Prezidente Repúblika mós pesimista katak, dalaruma bele tun tan karik. Iha merkadu finanseiru, nasaun-sira riku ne’ebé ita investe hela osan Fundu Minarai iha ne’ebá hatudu mós ona katak valór bolsa tun maka’as nu’udár konsekuénsia hosi hapara atividade ekonómika.

“Situasaun ida ne’e lori impaktu boot ba reseitas ba ita-nia Fundu Minarai. Ita-nia Banku Sentrál foin lalais ne’e fó sai relatóriu trimestrál ne’ebé hatudu retornu negativu husi investimentu. Tun pursentu haat virgula hitu (-4,7%) iha fulan janeiru to’o marsu, tinan ida ne’e. Ho retornu negativu, ita-nia Fundu Minarai lakon reseitas liu dólar milliaun atus ualu hatnulu (840 millioins), iha fulan haat nia laran,”  Xefe Estadu hateten.

Maski nune’e, nia hateten, biar osan Fundu Minarai la funan hanesan horiuluk, Timor-Leste iha hela oportunidade di’ak ida hodi aselera reformas estruturais.

“Ita bele haree filafali oinsá Timor-Leste bele sai País ida ne’ebé bele atrai duni investimentu husi rai-li’ur, hetan konfiansa husi investidór-sira no sai país ida ne’ebé seguru atu halo negósiu. Ita-nia País iha kapasidade atu nakfilak husi ekonomia-de-konsumu ba ekonomia-de -produsaun. To’o ona tempu atu produtór lokál sira aumenta liután sira-nia produsaun no produtividade, liuliu ba hahán báziku,” nia heteten.

Prezidente Repúblika apela ba sidadaun hotu-hotu atu sosa produtu lokál atu nune’e bele motiva ita-nia agrikultór no produtór-sira atu hasa’e sira-nia produsaun.

Nia reforsa katak, agrikultura mak baze ekonomia no seitór ida ne’ebé bele fó empregu barak liután ba sidadaun sira, nune’e, presiza investe maka’as iha agrikultura.

“Hamriik ho kbiit rasik mak fó sentidu ba ita-nia soberania nasionál proklama iha 28 novembru 1975 no restaura iha 20 maiu 2002. Ho COVID-19, ita haree moos ona katak importante tebes prodús rasik ita-nia hahán báziku no kaer metin polítika seguransa alimentár ida ne’ebé garante hahán ba ita-nia Povu, iha momentu ne’ebé de’it. Ita hotu tenke hatene prodús rasik ita-nia hahán,” nia fó hanoin.

Prezidente Repúblika apela ba sidadaun hotu-hotu atu kontinua fiar nafatin katak orgaun soberania hotu-hotu sei esforsa nafatin atu hatuur Timor-Leste nu’udár nasaun ida, iha rejiaun Ázia no Pasífiku, ne’ebé hatene hamriik ho matenek no kbiit rasik, ho identidade sosiál-kulturál rasik, nu’udár espíritu luta Libertasaun Nasionál ne’ebé tenke kaer metin nafatin.

Notísia Relevante: COVID-19 : Xefe Estadu Fó De’it Indultu ba Prizioneriu Na’in-184

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here