Sekretáriu Estadu SEACLN, Gil da Costa ‘Oan Soru’ atualiza progresu hosi fundu investimentu veteranu iha postu administrativu Viqueque Vila, ne’ebé hala’o iha salaun munisípiu Viqueque, sesta (06/08/21). Imajen Tatoli/Vitorino Lopes da Costa.

VIQUEQUE, 06 agostu 2021 (TATOLI)—Governu liuhosi Sekretáriu Estadu Asuntu Kombatente Libertasaun Nasionál (SEACLN sígla portugés) garante katak, fundu investimentu veteranu Timor-Leste ne’ebé kada fulan ko’a $30 hosi pensaun sei la lakon.

Sekretáriu Estadu SEACLN, Gil da Costa ‘Oan Soru’ hateten lia hirak-ne’e bainhira atualiza progresu hosi fundu investimentu ne’e ba veteranu iha postu administrativu Viqueque Vila, ne’ebé hala’o iha salaun munisípiu Viqueque, sesta ne’e.

Notísia relevante:SEACLN esplika prosesu verifikasaun dadus veteranu iha Viqueque

“Veteranu barak mak sei dúvida  ba osan $30 ne’ebé ko’a ba fundu investimentu veteran. Fundu ne’e sei la lakon tanba uluk liuhosi konkordánsia no aprovasaun hosi benefisiáriu no hetan aseitasaun hosi altu kargu rezisténsia, estrutura rejionál, no deliberasaun aprovadu iha 1º kongresu CCLN, iha 19-21 dezembru 2019,” Oan Soru hateten.

Oan Soru hatutan, antes ne’e mós molok implementasaun nia rasik mak halo sosializasaun iha fatin-fatin hodi enkoraza veteranu hotu-hotu hodi husik hela $1.00 kada loron, fulan ida $30 ba futuru jerasaun oan-sira.

“Veteranu na’in ba ukun-an, labele sai bainaka ba ekonomia. Veteranu tenke la’o rasik ho ita-nia ain rasik, hodi hateten ita mós bele. Pensaun sei hotu, maibé fundu sei iha esperansa ba futuru oan-sira nian,” nia haktuir.

Ho baze legál aprovasaun dekretu lei númeru 8/2020 6ª alterasaun ba dekretu lei númeru 15/2008 ba pensaun liuhosi Konsellu Ministru, promulgadu hosi Prezidente Repúblika iha 19 marsu 2020, hodi kria Gabinete Apoiu Programa Fundu Investimentu Veteranu Timor-Leste ne’ebé despaixu deside hosi númeru 01/MACLN-SEACLN/I/2020 tau matan ba fundu investimentu veteranu.

Programa fundu investimentu veteranu ne’e implemetan iha fulan janeru 2020 to’o agora no oras-ne’e   osan ne’e investe iha banku rua ho montante $15.874.157,64 no fundu ida-ne’e reponsabiliza hosi CCLN, no osan ne’e sei la lakon.

Totál osan ne’ebé investe ba banku rua  kompostu hosi Banku Nasionál Komérsiu Timor-Leste  (BNCTL sígla portugés) ho Banku Repúblika Indonézia (BRI) hamutuk $15.874.157,64, osan inan ka fundu ne’ebé ko’a hamutuk $15.656.814,94, osan funan menus kustu manutensaun $217.342,28, totál osan funan veteranu iha banku hamutuk $217.406,28.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here