Sekretáriu Estadu Asuntu Kombatente Libertasaun Nasionál (SEACLN sígla portugés), halo sosializasaun kona-bá verifikasaun dadus veteranu, iha postu administrativu Viqueque Villa, munisípiu Viqueque, sesta (06/08/21). Imajen Tatoli/Vitorino Lopes da Costa.

VIQUEQUE, 06 agostu 2021 (TATOLI)—Sekretáriu Estadu Asuntu Kombatente Libertasaun Nasionál (SEACLN sígla portugés), halo sosializasaun kona-bá levantamentu dadus uma lisan, verifikasaun dadus  veteranu ne’ebé rejista iha 2009 no estabelesimentu semitériu espesiál ba veteranu-sira iha postu administrativu Viqueque Villa, munisípiu Viqueque.

Sekretáriu Estadu SEACLN, Gil da Costa ‘Oan Soru’, esplika sosializasaun ida-ne’e ba levantamentu dadus kona-bá ema ne’ebé mate iha funu laran (1975 -1999) tanba ukun rasik-an, tuir uma-lisan ida-idak ne’ebé mate iha ba funu.

Notísia relevante:Populasaun Viqueque 21.845 simu ona vasina

“Tanba ita-nia ema mate ba funu ita seidauk sura hotu, bainhira loos mak ita bele sura hotu, tanba ne’e mak sai problema fundamental ba ita hotu. Tanba ida-ne’e mak ami mai halo sosializasaun ba veteranu sira atu halo levantamentu  dadus hodi bele identifika loloos veteran-sira,” SEACLN, Gil da Costa, hateten iha salaun munisipál Viqueque, sesta ne’e.

Oras ne’e daudaun, dadus rejistadu iha CLN hamutuk 200.923, no nia konsidera hanesan númeru ne’ebé seidauk serteza, tanba ne’e presiza buka-tuir.

“Ha’u sai membru Governu iha 2018, la’o hadulas fatin-fatin ne’ebé restu mortais rai bá, iha munisípiu no postu administrativu-sira Timor laran kuaze rihun 14-resin mak mate ba kilat musan, maibé tenke sura hotu mós sira ne’ebé mate ba hamlaha no seluk tan,  hodi hatuur istória loloos ba jerasaun foun-sira,” veteranu ne’e haktuir.

Nia afirma, iha verifikasaun ba dadus tenke hato’o naran ne’ebé  loloos labele inventa,   tanba iha loron 16 agostu  ekipa hosi SEACLN sei mai halo verifikasaun iha kada suku iha munisípiu Viqueque no sei akompaña hosi CLN munisípiu Viqueque.

Rejistu CLN iha Baze de Dadus, veteranu totál  200.923 iha teritoriu laran,  rejistadu hosi faze dahuluk ema na’in-76.068, daruak 2009 na’in 124.782, frente esterna na’in 73, vivo 141.911 no morto na’in-59.012.

Tuir dadus uma lisan hosi munisípiu Viqueque, hosi postu administrativu Lacluta 117, Ossu 301, Uatucarbau 160, Uatulari 634, Viqueque Vila 48, totál 1.260.

Sosializasaun  ne’e  partisipa hosi veteran-sira postu administrativu Viqueque Vila, prezidente CLN Viqueque, Polísia Nasionál Timor-Leste (PNTL) no autoridade lokál.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here