Ministra Saúde (MS), Odete Maria Freitas Belo, re-ativa vasina AstraZeneca doze dahuluk iha suku Lour, postu administrativu Bobonaro, munisípiu Bobonaro, kinta (05/08/21). Imajen Tatoli/Sérgio da Cruz.

BOBONARO, 05 agostu 2021 (TATOLI)—Ministra Saude (MS), Odete Maria Freitas Belo, re-ativa vasina AstraZeneca doze dahuluk iha suku Lour, postu administrativu Bobonaro, munisípiu Bobonaro, ne’ebé antes ne’e suspende, bainhira Hilária de Jesus hakotu-iis  hafoin simu vasina iha 30 juñu.

Odete Maria Freitas Belo husu ba família matebian Hilária de Jesus, atu labele impede programa vasina iha suku ne’e, tanba daudaun ne’e ema hotu-hotu preokupa tebes ho variante foun ne’ebé komesa aumenta makás iha nasaun viziñu Indonézia.

Notísia relevante:Reativa vasina iha Lour, MS tenke prepara ekipamentu adekuadu

“Ha’u husu famélia labele impede programa ne’e, ita tenke fó oportunidade ba komunidde ne’ebé iha vontade hakarak simu vasina. Ha’u mós triste ho tia Hilária de Jesus nia mate, maibé husik prosesu ne’e la’o no ita rezolve hamutuk,” nia ko’alia durante diálogu ho komunidade no família matebian, iha suku Lour, kinta ne’e.

Re-ativasaun vasinasaun ne’e, populasaun 48 mak konsege simu vasina AstraZeneca doze dahuluk, hosi númeru ne’e maioria joven idade 18 ho komorbilidade.

Xefe Suku Lour, Miguel Lopes Gomes, reprezenta komunidade agradese ba Ministra Saúde ne’ebé hakarak halo diálogu ho komunidade kona-bá importánsia hosi vasina AstraZeneca.

“Ha’u sujere, se bele orienta pesoál saúde-sira, mai halo sosializasaun profunda kona-bá vasina atu nune’e komunidade iha ne’e labele dúvida. Durante ne’e laiha duni informasaun klara ba sira,” Autoridade lokál ne’e sujere.

Jacarias Silva de Jesus, oan mane-ikun hosi matebian Hilária de Jesus, lakohi simu vasina bainhira Ministériu Saúde la prepara ekipamentu adekuadu ba pesoál saúde ne’ebé mai fó vasina iha suku Lour.

“Ami lakohi akontese tán hanesan ha’u-nia inan. Atu dehan deit ha’u prontu vasina bainhira sira mai ne’e ho ekipamentu  kompletu,” nia deklara.

Diálogu ne’e hetan partisipasaun hosi pontu vokál vasinasaun PNTL, Superintendente Xefe Arnaldo de Jesus no Komandante PNTL Bobonaro, Antoninho Mauluta inklui komunidade suku Lour.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here