Kondisaun atuál iha suku Lour, postu administrativu Bobonaro, munisípiu Bobonaro, sesta (03/07/21). Imajen Tatoli/ Sérgio da Cruz.

BOBONARO, 03 jullu 2021 (TATOLI)—Xefe suku Lour, Miguel Lopes Gomes, husu Ministeriu Saúde (MS), atu prepara ekipamentu médiku ne’ebé adekuadu, molok reativa programa vasina iha suku Lour, postu administrativu Bobonaro, munisípiu Bobonaro, ne’ebe provizoriamente suspende hela.

Miguel Lopes Gomes husu ne’e relasiona ho inan-faluk Hilária de Jesus, ne’ebé hakotu-iis, hafoin simu vasina AstraZeneca iha 30 juñu 2021.

Notísia relevante:Governu-família halo’ot mate-isin Hilária de Jesus

“Ha’u-nia komunidade ne’ebé lakon vida hafoin simu vasina ne’e, hanesan autoridade hakarak rekomenda ba Governu, atu toma responsabilidade ba situasaun ne’e. Favór prepara ekipamentu saúde nian kompletu,” Miguel Lopes Gomes hateten ba jornalista Agência Tatoli, via telefónika, sábadu ne’e.

Autoridade lokál ne’e rekomenda ba Governu, bainhira iha ona planu atu kontinua halo vasina karik iha suku ne’e, presija halo uluk sensibilizasaun kle’an no prepara ekipamentu kompletu atu bele garante atendimentu saúde ne’ebé di’ak ba komunidade.

“Ha’u haree pesoál saúde-sira halo atendimentu ladún di’ak. Sira mai ho fasilidade koko tensaun de’it, buat seluk laiha no sira mai utiliza de’it motór. Situasaun ne’e akontese tiha ona, susar tebes sira atu salva, tanba ambulánsia de’it laiha. Situasaun ne’e halo komunidade trauma,” nia deklara.

Entertantu programa vasina iha suku Lour, hahú iha 28 juñu fó ba ema na’in 12, iha loron daruak ema na’in 24 no iha 30 juñu hanesan loron ikus ema na’in 48.

Bainhira inan-faluk Hilária de Jesus hakotu-iis, hafoin simu vasina, Xefe Suku deklara hodi suspende provizoriamente no seidauk reativa.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here