DILI, 01 jullu 2021 (TATOLI)—Komisaun Anti Korrupsaun (CAC sígla portugés), kontinua hala’o prosesu investigasaun kriminál ba ró Tranship II Gresik Indonézia, maski oras-ne’e daudaun operasaun la’o hela.
“Ita halo ona esforsu kona-bá serbisu prevensaun no hato’o ona ba instituisaun relevante hodi rekomenda dadus no deskobrimentu liga ba kontratu, prosesu aprovizionamentu ne’ebé hetan duni indísiu lubuk ida hatudu poténsia ba irregularidade. Ita hato’o atu konsidera, maibé laiha resposta pozitivu, tanba ne’e maski ró ne’e hala’o nafatin operasaun, maibé prosesu investigasaun kriminál kontinua la’o,’’ Adjuntu Komisáriu CAC ba Asuntu Prevensaun no Sensibilizasaun, Luís Oliveira Sampaio, hateten ba jornalista Agência Tatoli, kinta ne’e.
Notísia relevante:Prosesu kontratu ró Tranship II, CAC aprezenta notísia krime ba MP
CAC laiha kompeténsia atu obriga hapara operasaun ne’ebé daudaun kontinua la’o maski prosesu tama ona iha prosesu judisiál.
CAC mós hato’o ona auto-partisipasaun ka notísia krime ba Ministéiru Públiku (MP), hodi hein despaixu atu loke prosesu tuir-mai.
Iha 28 juñu, Ministru Transporte no Komunikasaun (MTK), José Agostinho, anunsia katak ró-ahi KMP Tranship II kontinua hala’o operasaun normál bá-mai Dili-Óe-cusse no Ataúro.
Ministru ne’e hatutan, Governu kontrata ró ne’e hodi fasilita movimentu via marítima tanba ró-ahi Sukses sei ba halo manutesaun no renova dokumentu lisensa, enkuantu ró-ahi Berlin Nakorma avaria desde 2020.
Governante ne’e defende katak, kondisaun ró Tranship di’ak hela, tanba relatóriu hosi Diresaun Nasionál Transporte Marítima ne’ebé lei atribui kompeténsia ba sira atu halo inspesaun hatudu katak, ró ne’e bele halo movimentu.
Ró-ahi KMP Tranship II hosi Surabaya, Indonézia atraka iha portu Dili iha 25 maiu, hodi substitui ró Nakroma no Sukses ne’ebé atu halo manutesaun.
Tuir kontratu ne’ebé Governu estabelese ho ró Tranship II sei halo operasaun semana ida dala-ida, iha segunda ho destinasaun Óe-cusse-Dili-Ataúro no Dili-Óe-cusse-Ataúro.
Kontratu ho kompañia estranjeiru ne’e kada fulan $220.000, no ninia kapasidade tula pasajeiru hamutuk na’in-300 inklui sasán ho kapasidade tonelada 1.000-resin.
Jornalista: Nelson de Sousa
Editór: Cipriano Colo
