VIQUEQUE, 05 agostu 2021 (TATOLI)—Ministériu Agríkultura no Peska (MAP) kolleta hare nakroma hamutuk ektare 24 no hare demo-area ektare 80 iha natar irrigasaun Bebui, suku Afaloikai, postu adiministrativu Uatulari, munisípiu Viqueque, kinta ne’e.
Ministru MAP, Pedro dos Reis, enkoraza povu agrikultór tenke serbisu hamutuk ho Governu hodi hasa’e produsaun ai-han iha rai laran, la’ós para de’it iha ektare 24 ne’ebé kolleta ona, maibé ba futuru tenke habelar liu tan hodi utiliza teknolojia ne’ebé iha.
Notísia relevante:Kooperativa CDP-RDTL kolleta hare ektare rua iha Matahoi
“Ho prezensa ohin nian la’ós para de’it ona iha ne’e, maibé ba futuru sei halo espansaun hodi uza teknolojia oinsa hasa’e produtividade,” Pedro dos Reis hateten ba jornalista-sira, iha natar Bebui.
Governante ne’e hatutan, bainhira kontinua ho sistema manuál maka produsaun sei la sa’e maske rai bokur.
Tanba ne’e, MAP ho parseiru-sira iha ona planu atu hala’i natar tenki tuir padraun no uza adubu, sei hadi’a ai-han iha Timor-Leste.
Iha fatin hanesan, xefe suku Afaloikai, Costantino Guterres, haktuir iha tempu hala’i natar povu agrikultór falta maka tratór no ai-moruk tanba ne’e Governu presiza tau atensaun.
Nune’e mós Prezidente Asosiasaun Haburas Fini Komersiál (AHFK), Martino de Fátima, hateten produsaun hosi AHFK iha epoka 2021, ne’e kolleta ona hare ba da-ualu, desde ezisténsia AHFK iha 2014.
Partisipa iha kolleta hare ne’e eis Prezidente Repúblika, José Ramos Horta, Diretór Country WFP, diretór ezekutivu CLN no populasaun agrikultór postu administrative Uatulari.
Jornalista: Vitorino Lopes da Costa
Editór: Cipriano Colo