Kooperativa Organizasaun Unijmas ativista CPD-RDTL, kolleta hare ektare rua iha natar Paetun, suku Matahoi, postu adiministrativu Uatulari, Munisípiu Viqueque, tersa (03/08/21). Imajen Tatoli/Vitorino Lopes da Costa.

VIQUEQUE, 03 agostu 2021 (TATOLI)—Kooperativa Organizasaun Unijmas ativista CPD-RDTL, kolleta hare ektare rua iha natar Paetun, suku Matahoi, postu adiministrativu Uatulari, Munisípiu Viqueque.

Koordenadór Unijma CPD-RDTL rejiaun Viqueque, Hernesto da Costa Monteiro ‘Kulabu’, hateten inisiativa kolleta hare kooperativa atu motiva populasaun oinsa hasa’e produsaun iha rai-laran, nune’e labele depedénsia ba importasaun hosi rai-liur.

Notísia relevante:SECoop Koleta Hare Husi MCAEP Iha Sagadate

“Ne’e inisitiva rasik oinsa estabelese kooperativa atu hasa’e produasaun hare, no ohin ita kolleta duni. Ida-ne’e sai modelu di’ak atu redús importasaun,” Hernesto da Costa Monteiro ‘Kulabu’, hateten ba jornalista iha natar Paetun, tersa ne’e.

Tuir planu hosi kooperativa ne’e katak, produsaun hare ne’ebé iha sei distribui ba Governu iha komemorasaun loron nasionál Timor-Leste nian, no sei fó apoiu ba oan ki’ak ho inan-faluk sira, hodi sustenta sira-nia moris.

Iha fatin hanesan, xefe suku Matahoi, António Amaral, konsidera kooperativa produsaun hare ne’ebé CPD-RDTL realiza hanesan inisiativa diak ba populasaun.

“Inisiativa ida-ne’e sei motiva populasaun badinas liu tán atu halo toos no natar, maibé presiza apoiu hosi Governu ba agrikultór-sira,” nia sujere.

Nune’e mós reprezentante veteranu, António Gusmão ‘Mau-Cara’, husu Governu tau-matan ba povu agrikultór atu hasa’e produsaun, tanba iha tempu rezisténsia kooperativu moris hodi sustenta ba forsa sira iha ai-laran.

Governu presiza hadi’a irrigasaun tolu

Xefe suku Matahoi, António Amaral mós husu Governu presiza hadi’a irrigasaun tolu ne’ebé liga ba natar Paetun, hamutuk ekatare 500 lokaliza iha suku ne’e.

“Husu Governu liuliu Ministériu Agrikultura no Peskas (MAP), presiza hadi’a irrigasaun iha Paetun fatin tolu hanesan irrigasaun Saelerin, Paetun no Olo-Malae. Ami hatama ona proposta ba Governu, maibé seidauk  iha resposta ruma,”António Amaral, hateten.

Serimónia kolleta ne’e, partisipa hosi Polísia Nasionál Timor-Leste (PNTL) eskuadra Uatulari, autoridade lokál no veteranu.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here