Natar iha suku Afalokai, postu administrativu Uatulari, munisípiu Viqueque, kinta (06/08/21). Imajen Tatoli/Vitorino Lopes da Costa.

VIQUEQUE, 05 agostu 2021 (TATOLI)—Diretór ezekutivu Sentru Nasionál Lojístika (CLN sígla portugés), Jacinto Pajo, informa Governu aloka orsamentu rihun $12 atu sosa hare-kulit ho presu kada kilograma 0.52 sentavu, tanba ne’e husu povu agrikutór postu administrativu Uatulari tenke badians hasa’e produsaun hare.

“Polítika Governu atu redús importasaun. Tanba ne’e, ha’u dehan ba inan-aman sira katak, CLN instala ona armazen boot rua iha Natarbora ho kapasidade  atu bele rai hare tonelada 500. Governu aloka ona osan rihun $12 ba CLN atu sosa hare-kulit,” Jacinto Pajo, hateten ba jornalista Agência Tatoli, iha suku Afaloikai, kinta ne’e.

Notísia relevante:MAP kolleta hare nakroma ektare 24 iha Uatulari

Nia dehan, vizaun no misaun hosi CLN  maka prezerva estoke foos ba povu no nasaun, nune’e sei  sosa produtu lokál hodi fó serbisu ba joven-sira.

“Tinan barak ita-nia Governu sosa foos hosi nasaun liur, maibé povu agrikultór Uatulari mak hasa’e ona produsaun agríkola, Governu sei la sosa tan foos hosi nasaun seluk,” nia subliña.

Iha fatin hanesan, xefe suku Afaloikai, Costantino Guterres, haktuir Governu liuhosi Ministériu Agrikultura no Peska (MAP), presija buka dalan hodi hasa’e produsaun hare no hadi’a merkadu hanesan programa Cesta Bázika.

Autoridade lokál ne’e konsidera programa Cesta Bázika ajuda tebes povu agrikultór iha territóriu tomak liuliu iha Uatulari.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here