Inséndiu iha k’nua Modoho'o, suku Uailili, kuarta (23/06). Imajen/Espesiál

BAUCAU, 04 agostu 2021 (TATOLI)–Reprezentante vítima inséndiu, Frederico Marques do Carmo, hateten, hafoin akontesimentu ahi-han uma-lisan tolu no uma baibain rua to’o mutuk iha k’nua Modoho’o, aldeia Uaturau de Sima, suku Uailili, postu administrativu Baucau villa, munisípiu Baucau, to’o agora vítima sira seidauk hetan apoiu ruma hosi Governu.

“Hosi parte sosiál to’o agora seidauk iha ajuda, maski ami halo ona proposta ba Sekretaria Estadu Arte Kultura (SEAK) iha loron 16 jullu, maibé to’o agora seidauk iha resposta. Triste tanba esforsu hotu halo ona tanba vítima inséndiu presiza tebes tulun,” Frederico Marques informa ba Agência TATOLI, via telefónika, kuarta ne’e.

Totál vítima inséndiu hamutuk iha família lima, ho totál abitante pur volta 35.

Tuir Frederico Marques, vítima sira presiza tebes atensaun hosi autoridade relevante tanba akontesimentu ne’e iha loron kuarta (23/06), pur volta tuku 11:00 resin, bainhira maioria família (mane) iha k’nua Modoho’o sai hotu hosi uma atu kee rai kuak hodi prepara prosesu funebre ba família ida ne’ebé mate iha simitériu Uailili.

Notísia relevante: Inséndiu iha Uailili, uma-lisan tolu no uma rua afetadu

Maski autoridade no abitante sira halo ona esforsu hodi to’o iha fatin akontesimentu, maibé ahi han mutuk ona uma-lisan no komunidade nia uma.

Kauza loloos, ahi dahuluk han iha uma-lisan nia kakuluk, hafoin kontinua ba uma-lisan seluk inklui uma komunidade rua, nune’e tanba kondisaun la permite, konsege salva de’it sasán lulik balun iha uma-lisan, maibé sasán seluk la konsege salva,” nia akresenta.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here