Inséndiu iha k’nua Modoho'o, suku Uailili, kuarta (23/06). Imajen/Espesiál

BAUCAU, 25 juñu 2021 (TATOLI)—Inséndiu akontese iha k’nua Modoho’o, aldeia Uaturau de Cima, suku Uailili, postu administrativu  Baucau villa, munisípiu Baucau, iha kuarta (23/06) tuku 11:00 dadeer, hodi rezulta ahi han mutuk uma-lisan tolu no uma rua afetadu, ne’ebé ema 35 sai vítima.

Reprezentante vítima inséndiu, Frederico Marques do Carmo, hateten, vítima inséndiu sira presiza tebes tulun no prezensa hosi institusaun Estadu hanesan Ministériu Solidaridade Sosiál no Inkluzaun (MSSI) no Sekretaria Estadu Arte no Kultura (SEAK) atu diretamente to’o iha fatin akontesimentu.

Inséndiu iha k’nua Modoho’o, suku Uailili, kuarta (23/06). Imajen/Espesiál

“Iha-ne’e la’ós uma baibain de’it, maibé inklui uma-lisan, tanba ne’e ami hato’o ba Sekretaria Estadu Arte no Kultura, atubele mai diretamente mai ami tanba inséndiu ne’e kona uma-lisan tolu kedas,” Frederico Marques, informa ba Agência TATOLI, via telefónika, sesta ne’e.

Vítima inséndiu ne’e haktuir, durante akontesimentu, maioria família (mane) iha k’nua Modoho’o sai hotu hosi uma atu kee rai-kuak hodi prepara prosesu funebre família ida mate iha simiteiru Uailili.

“Bainhira kee hela rai-kuak, rona informasaun katak akontese inséndiu iha k’nua, maski ho esforsu to’o iha fatin akontesimentu maibé ahi han mutuk ona uma-lisan tolu inklui uma rua,” nia akresenta.

Inséndiu iha k’nua Modoho’o, suku Uailili, kuarta (23/06). Imajen/Espesiál

Nia konta tuir, ahi dahuluk han iha uma-lisan nia kakuluk no tamba kondisaun la permite, labele salva uma-lisan no uma komunidade.

“Hosi uma-lima ne’ebé ahi han, bele salva de’it mak sasán lulik, enkuantu sasán seluk la konsege salva. Ami mane sira sai hotu ba kee rai-kuak, tanba ne’e sasán uma laran la konsege salva, úniku avó lulik (sasán lulik) mak labarik sira foti sai,” Frederico hatutan.

Hafoin akontesimentu ne’e, vítima sira konsege tenta halo kontaktu ba autoridade suku no institusaun kompetente hanesan xefe suku, aldeia, protesaun sivíl munisipál, Bombeiru no Crus Vermelha de Timor-Leste (CVTL) munisípiu Baucau, nune’e entidade balun konsege to’o iha fatin akontesimentu.

“Protesaun sivíl ho CVTL mak mai haree, orseik ajudu emerjénsia oituan to’o ona mai, hanesan foos saka rua, mina sona, bikan, kanuru, kaneka, no biti, maibé terpal (tenda) laiha, ami presiza terpal,” nia dehan.

Daudaun ne’e, vítima inséndiu hela provizóriu ho família iha k’nua Modoho’o.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here