Ministru Prezidénsia Konsellu Ministru, Fidelis Maunel Leite Magalhães. Imajen TATOLI/Francisco Sony

DILI, 04 agostu 2021 (TATOLI)—Ministru Administrasaun Estatál, Miguel Pereira de Carvalho, aprezenta Projetu Rezolusaun Governu iha reuniaun Konsellu Ministru (KM) kona-ba atualizasaun no aprovasaun kalendáriu operasaun resensiamentu eleitorál iha estranjeiru, ba Eleisaun Prezidensiál ne’ebé sei realiza iha marsu 2022.

Ministru Prezidénsia Konsellu Ministru, Fidelis Manuel Leite, hateten, Rezolusaun Governu ne’ebé hetan aprovasaun ona, ho objetivu atu asegura realizasaun operasaun resensiamentu eleitorál iha estranjeiru hodi permite timor-oan sira iha rai-li’ur iha direitu ba votu.

Notísia relevante: STAE-CNE lansa resensiamentu eleitorál ba preparasaun eleisaun prezidensiál 2022

“Atividade no atualizasaun inskrisaun resensiamentu eleitorál sei hala’o iha loron 03 setembru 2021 to’o loron 14 janeiru 2022, ne’ebé sei sai períodu naruk tebes, la hanesan baibain tanba situasaun pandemia,” Ministru relata hafoin reuniaun ezekutivu iha Palásiu Governu, kuarta ne’e.

Atividade ne’e, aleinde ba misaun diplomátika no postu konsulár sira, sei mós halo mós iha postu resensiamentu móvel sira iha Austrália, iha Koreia Súl, Portugál no Reinu Unidu.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here