Sentru formasaun Beaço. Imajen Tatoli/Vitorino Lopes da Costa.

VIQUEQUE, 04 agostu 2021 (TATOLI)—Sekretáriu Estadu Formasaun Profisionál no Empregu (SEFOPE) liu hosi Diretór munisipál Viqueque, Simões da Silva, informa kandidatu hamutuk 119 ne’ebé hakarak tuir formasaun iha Sentru Formasaun Beaço, partisipa teste eskrita iha kuarta ne’e.

“Tuir dadus ne’ebé rejistadu ba formasaun iha SEFOPE Viqueque hamutuk na’in-207, maibé kandidatu barak mak la partisipa iha teste.  Ohin, kandidatu ba formasaun Beaço na’in 119 mak tuir teste eskrita,” Simões da Silva, hateten ba jornalista Agência Tatoli, kuarta ne’e.

Notísia relevante:Agostu, re-ativa sentru formasaun Beaço

Simões da Silva, esplika kandidatu-sira ne’ebé  la partisipa iha teste eskrita ne’e siginifika lakon, tanba  bainhira parte SEFOPE halo kontaktu, balun númeru dezligadu no balun la atende telefone.

Fatin teste iha salaun munisipál Viqueque ne’ebé  hala’o  durante loron rua hahú 04 to’o 05 agostu 2021, no rezultadu depende avaliasaun.

Ekipa ezaminadór hosi sentru formasaun Becora ho sentru formasaun Beaço hamutuk na’in-hitu, SEFOPE Viqueque sai hanesan observadór ba teste ne’e.

Matéria ba teste mak hanesan, Matemátika bázika, Kímika bázika, fízika bázika no istória Timor-Leste nian.

Bainhira pasa, kandidatu  sira-ne’e  sei   tama iha área formasaun konstrusaun jerál, eletrisidade, karpintaria, kanalizasaun, soldadura no pedreiru.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here