Sentru formasaun Beaço. Imajen Tatoli/Vitorino Lopes da Costa.

VIQUEQUE, 28 jullu 2021 (TATOLI)—Sekretáriu Estadu Formasaun Profisionál Empregu (SEFOPE) liuhosi Diresaun Munisípiu Viqueque, sei re-ativa sentru formasaun Beaço, ne’ebé paradu durante situasaun COVID-19.

“Durante ne’e sentru formasaun Beaço paradu. Maibé ami iha ona planu atu re-ativa formasaun  iha fulan agostu. Ami koordena ona atu halo teste swab ba kandidatu-sira,” Diretór SEFOPE munisípiu Viqueque, Simões da Silva informa ba jornalista Agência Tatoli, kuarta ne’e.

Notísia relevante:Durante EE atividade sentru formasaun iha Beaço paradu

Parte sentru formasaun ne’e mós prepara ona kondisaun, bainhira re-ativa duni sei kumpre regra hosi Organizasaun Mundál Saúde (OMS) no Ministériu Saúde (MS) ba prevensaun COVID-19.

Tinan 2021, sentru formasaun Beaço iha kandidatu na’in 222 rejista ona ba área formasaun hamutuk lima no kandidatu-sira seidauk submeta ba teste tanba sei hein desizaun los ona mak bele realiza teste.

Mekanizmu ne’e, Sentru Formasaun sei kontaktu de’it ba kandidatu ida-idak, bainhira kandidatu  ne’ebé dezliga telefone ka la simu telefone,  signifika lakon ninia oportunidade ba formasaun.

Tuir planu, bainhira formasaun hahú sei limita ema iha sala-de-aula no sei prienxe de’it ema na’in 20 hodi mantein distansiamentu sosiál.

Sentru formasaun ne’e iha programa lima (5) mak hanesan knstrusaun jerál, eletrisidade, karpintaria, kanalizasaun, soldadura no pedreiru.

Nune’e mós diretór serbisu saúde munisípiu Viqueque, Francisco de Carvalho, hateten teste masal ba estudante-sira ne’e tama ona iha planu no hein hela pedidu formál hosi parte SEFOPE.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here