Atividade deputadu sira liuhosi plenária Parlamentu Nasionál. Dokumentasaun.

DILI, 04 agostu 2021 (TATOLI)—Ministériu Justisa (MJ), sei hein relatóriu hosi parte tékniku Diresaun Nasionál Terras no Propriedade (DNTP), hodi indika rai atu halo konstrusaun ba edifísiu foun Parlamentu Nasionál (PN).

“Horisehik tékniku terras no propriedade reuniaun ho PN, maibé ha’u seidauk simu relatóriu ofisiál. Bainhira simu ona mak ita sei bele atribui rai ba PN hodi halo konstrusaun,” Ministru Justisa, Manuel Cárceres da Costa, hateten ba jornalista Agência Tatoli, iha Palásiu Governu, Dili, kuarta ne’e.

Notísia relevante:Prosesu harii edifísiu própriu, PN hein notifikasaun MJ

Nia dehan, tuir pedidu PN antes ne’e husu atu atribui rai ida iha Ministéiru Justisa nia-oin ne’ebé lokaliza  iha Caicoli, tanba ne’e MJ sei hein relatóriu molok indika.

Antes ne’e Adjuntu Sekretáriu Jerál Parlamentu Nasionál, João Rui Amaral, informa katak, iha fatin rua mak indika ona hanesan iha Ministériu Justisa nia-oin no ida iha Hudilaran, iha Palásiu Prezidensiál Nicolau Lobato nia sorin, maibé sei hein notifikasaun hosi Ministériu Justisa.

Iha loron 30 abríl 2021, Sekretáriu Jerál Parlamentu Nasionál, Adelino Afonso Gomes, fó-sai katak prosesu harii edifísiu própriu Parlamentu Nasionál (PN), tama ona iha faze estudu viabilidade no dezeñu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here