Prezidente Parlamentu Nasionál, Aniceto Longuinhos Guterres Lopes, observa hela esketsa futuru edifísiu própriu Parlamentu Nasional. Esketsa dezeña ne’e hala’o iha lejislatura dahuluk nia tempu. Imajen/Evaristo Soares Martins.

DILI, 21 jullu 2021 (TATOLI)—Prosesu atu konstrui edifísiu própriu Parlamentu Nasionál nian sei hein notifikasaun hosi Ministériu Justisa (MJ) tanba Ministériu Justisa mak sei hatudu fatin hafoin avansa ba prosesu konstrusaun.

Adjuntu Sekretáriu Jerál Parlamentu Nasionál, João Rui Amaral, esplika prosesu kona-ba edfiísiu foun Parlamentu Nasionál la’o hela.

Notisia Relevante: Vizaun atu harii edifísiu própriu PN tanba kada lejislatura gasta $1.755.000,00

“Prosesu la’o hela. Agora daudaun ami hein hela notifikasaun hosi Ministériu Justisa atu define didi’ak fatin nune’e ami bele avansa ba prosesu seluk,” Adjuntu Sekretáriu Jerál Parlamentu Nasionál, João Rui Amaral, informa ba jornalista sira, iha resintu Parlamentu Nasionál, kuarta ne’e.

Fatin rua mak indika ona hanesan iha Ministériu Justisa nia oin no ida iha Hudilaran, iha Palásiu Prezidensiál Nicolau Lobato nia sorin, maibé sein hein notifikasaun hosi Ministériu Justisa.

Antes ne’e iha loron 30 abríl 2021 liubá, Sekretáriu Jerál Parlamentu Nasionál Adelino Afonso Gomes, fó-sai katak prosesu harii edifísiu própriu Parlamentu Nasionál (PN) nian tama ona iha faze estudu viabilidade no dezeñu.

Nia hatutan, orsamentu privativu prevee tiha millaun $3 maibé iha orsamentu retifikativu foin lalais sofre alterasaun millaun $2,5, entaun verba kapitál dezenvolvimentu hosi Parlamentu Nasionál nian hela de’it rihun $500.

Maibé, nia subliña, faze estudu viabilidade no dezeñu prevee ona iha Fundu Infraestrutura ho rihun $240.

“Edifísiu Parlamentu Nasionál agora daudaun iha faze estudu no dezeñu. Estudu no dezeñu ne’e osan iha Fundu Infraestrutura ne’ebé orsamentu tiha ona dezde tinan rua liubá hamutuk rihun $240. Osan ne’e sufisiente halo faze preliminária estudu no dezeñu ne’e,” nia informa ba jornalista sira.

Sekretáriu Jerál Parlamentu Nasionál ne’e hateten, edifísiu própriu Parlamentu Nasionál ne’e sei harii iha foho-leten área Tasi-Tolu nian.

“Fatin ne’e, iha Tasi-Tolu parte foho-leten. Oras ne’e sei tama iha konsolidasaun faze estudu viabilidade. Rai ne’e Estadu nian ho ektare 38,” nia dehan.

Entretantu iha loron 19 agostu 2020 liubá, Prezidente Parlamentu Nasionál, Deputadu Aniceto Longuinhos Guterres Lopes, hateten vizaun atu harii edifísiu própriu Parlamentu Nasionál inklui rezidénsia ba deputadu sira tanba kada lejizlatura gastu ba subsídiu boot tebes.

“To’o agora deputadu ida simu $450 ba alojamentu kada fulan, tinan ida (1) deputadu ida hetan $5.400, tinan ida deputadu 65 hetan $351.000,00. Iha lejizlatura ida (tinan 5) Estadu gasta S1.755.000,00 ba dei’t alojamentu. Bainhira harii duni, redús ka elimina totál orsamentu ida-ne’e entaun presiza duni rezidénsia ba deputadu besik kedas sede Parlamentu Nasionál. Kestaun seluk mak efikásia tempu servisu,” Prezidente Parlamentu Nasionál argumenta iha momentu ne’ebá.

Nia afirma, públiku hatene ona kona-ba frakeza kumprimentu oras servisu deputadu sira, tanba razaun barak liu kona-bá inkumprimentu oras servisu ne’e mak distánsia hela-fatin ho sede Parlamentu Nasionál ne’ebé dook ba deputadu lubuk ida.

Deputadu Aniceto Guterres subliña, deputadu sira presiza kumprimenta rigorozu oras servisu kondisiona ho fatin no fasilidade servisu ne’ebé adekuadu sei produz rezultadu ne’ebé ho kualidade di’ak liután iha futuru.

“Ne’e duni sede Parlamentu Nasionál, rezidénsia ba deputadu, fasilidade no kondisaun adisionál seluk ne’ebé relevante presiza hanoin no tetu agora para lori ita hotu kontribui ba forma ita-nia Parlamentu Nasionál ho deputadu ne’ebé dezempeña servisu ho kualidade di’ak liután iha futuru,” nia dehan.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here