Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (04/08). Imajen TATOLI/Egas Cristóvão

DILI, 04 agostu 2021 (TATOLI)–Governu liuhosi reuniaun Konsellu Ministru (KM) iha kuarta ne’e, deside impoin serka sanitária iha suku Naimeco, sub-rejiaun Pante Makasar no suku Bobometo, sub-rejiaun Oésilo, Rejiaun Administrativa Espesiál Oé-cusse Ambeno (RAEOA), hahú tuku 00:00 loron 05 agostu 2021 to’o tuku 23:59 loron 18 agostu 2021.

“Konsellu Ministru impoin serka sanitária iha suku rua tanba haree númeru infesaun COVID-19 aumenta maka’as, tanba ne’e maka tenke foti desizaun atu fó kbiit legál ba RAEOA hodi limita direitu sidadaun halo movimenta ho livre,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha Palásiu Governu, kuarta ne’e.

Notísia relevante:  Governu impoin konfinamentu domisiliáriu jerál iha postu administrativu rua iha Ermera

Desizaun ne’e bandu sirkulasaun ema hosi suku rua bá fatin seluk, exetu iha kazu hirak ne’ebé ninia fundamentu forte tanba razaun seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku.

Maski nune’e, la inklui proibisaun sirkulasaun ba individuu ne’ebé komprova vasinasaun kompleta ka doze daruak kontra COVID-19 inklui labarik sira ho idade tinan 6 mai kraik ne’ebé akompaña individuu sira ne’e.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here