Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (14/07). Imajen TATOLI/Egas Cristóvão

DILI, 30 jullu 2021 (TATOLI)-Governu liuhosi reuniaun ezekutiva kuarta ne’e, deside impoin konfinamentu domisiliáriu  jerál iha postu administrativu Railaku no Ermera, munisípiu Ermera hahú tuku 00:00 loron 31 fulan-jullu to’o tuku 23:59 iha loron 11 fulan-agostu 2021.

Desizaun ne’e Konsellu Ministru foti hafoin analiza aprezentasaun kona-ba pontu situasaun epidemiolójika nasionál iha munisípiu Ermera husi Sala  Situasaun Sentru Integradu Jestaun Krize (GASC, sigla portugés), tanba evolusaun hosi epidémika ne’ebé agrava liu ho númeru kazu COVID-19 sa’e maka’as.

Notísia relevante ; http://www.tatoli.tl/2021/07/28/governu-impoin-hikas-serka-sanitaria-iha-ermera-renova-iha-dili/

“Haree ba evolusaun husi situasaun epidémika iha Ermera ne’ebé agrava liu, ho númeru kazu diagnostíkadu husi vírus SARS-CoV ne’ebé sa’e maka’as iha munisípiu ne’e, atu prevene risku ne’ebé mosu husi propagasaun COVID-19, nune’e Konsellu Ministru aprova projetu Rezolusaun Governu nian ne’e impoem konfinamentu domisiliáriu jerál ba populasaun iha postu administrativu Ermera no Railaku iha munisípiu Ermera”, Ministru Prezidénsia KM, Fidelis Manuel Leite Magalhães relata, hafoin reuniaun ezekutivu iha Palásiu Governu.

Ho nune’e impoin konfinamentu domisiliáriu jerál ba ema hotu ne’ebé maka hela ka oras ne’e iha hela munisípiu Ermera, tenke hela iha sira nia uma ka iha sira nia alojamentu temporáriu, ne’ebé inklui sentru akollimentu, exetu iha situasaun ne’ebé prevee iha diploma ne’e, liuliu ba razaun saúde, serbisu, ba asesu ba sasan no servisu nesesidade dahuluk nian.

Maske nune’e,  rezolusaun ne’e la abranje ba impozisaun konfinamentu domisiliáriu individu ne’ebé komprova vasinasaun kompleta ka doze daruakhasoru COVID-19.

Portavós Governu ne’e salienta, bandu halo sirkulasaun ba transporte públiku iha área hotu iha munisípiu Ermera nian, liuliu mikrolet, biskota no anguna.

Enkuantu, bandu atu halo selebrasaun koletiva relijioza, no mós atu hala’o serimónia fúnebre ne’ebé involve partisipasaun liu ema na’in sanulu, iha ne’ebé, durante serimónia ne’e rasik tenke uza máskara oin nian hodi taka inus no ibun no mantein distánsia, pelumenus metru ida ho ema seluk iha serimónia ne’e.

Taka ba públiku estabelesimentu komersiál, industriál, artezanál ka prestasaun servisu, ho esesaun estabelesimentu ne’ebé autoriza iha Rezolusaun Governu ne’e, liuliu estabelesimentu ba faan ai-han  sira no sasan primeira nesesidade nian, eletrisidade, telekomunikasaun, prestasaun kuidadu médiku, farmásia, postu kombustivel nian, instituisaun finanseira sira.

No restaurante sira no empreza sira bele fornese hahan  iha rejime take away ka entrega iha uma de’it no estabelesimentu sira-seluk ne’ebé taka ba públiku bele dezenvolve ninia atividade liuhusi servisu entrega ba uma de’it

Maibé permite atividade ba vendedór ambulante ba sasán alimentár no sasan ba primeira nesesidade nian. Merkadu sira iha munisípiu Ermera, mantein ninia funsionamentu, husi tuku 6 dader to’o tuku 6 lorokraik.

Ezekutivu sira mós aprova mós deliberasaun ida atu orienta Ministra Saúde, Odete Maria Freitas Belo no Departamentu sira hotu ne’ebé responsavel ba kampaña vasinasaun, atu nune’e bele mobiliza rekursu nesesáriu sira hotu atu hasa’e númeru vasina loron-loron iha área munisípiu Ermera no dalan ida ne’e bele hasa’e persentajen populasaun ne’ebé vasina ona iha munisípiu ida-ne’e.

Jornalista       : Antónia Gusmão

Editór             : Cipriano Colo

HAKEREK NO HATÁN

Please enter your comment!
Please enter your name here