Ekipa rede ba rai, hala’o konferénsia imprensa iha Faról, tersa (03/08/21). Imajen Tatoli/Nelson de Sousa.

DILI, 03 agostu 2021 (TATOLI)—Rede ba rai hala’o serbisu tuir estatutu, prinsípiu no vizaun  katak ‘povu Timor-Leste ne’ebé moris nafatin ho direitu no asesu ba rai no hela fatin ne’ebé justu no sustentavel’.

Serbisu ne’e sai ona dever atu defende direitu ba rai komunidade, nune’e kualkér dezenvolvimentu ne’ebé Estadu implementa, tenke bazeia ba lei ne’ebé vigór no dignifika povu.

Notísia relevante:Rede ba Rai no abitante uma-kain 11 keixa Ministru Justisa

Lia hirak-ne’e hato’o hosi portavóz rede ba rai, Jenicarte M dos Reis, ba jornalista-sira liuhosi konferénsia imprensa iha Faról, tersa ne’e.

Nia hateten, rede ba rai nu’udár organizasaun sosiedade sivíl ho membru hamutuk 24, kompostu hosi Organizasaun Naun Governamentál (ONG) lokál haat, nasionál no internasionál ne’ebé harii iha 12 marsu 2001, atu hala’o serbisu ba asuntu rai nian, hanesan monitorizasaun ba lei no polítika ne’ebé prodús hosi Governu no Parlamentu Nasionál, hala’o mós akompañamentu ba kazu, edukasaun legál no mobilizasaun ba komunidade.

Liuhosi serbisu akompañamentu kazu-sira ne’ebé rede ba rai halo no publika iha mídia hanesan (kazu sidade univesitáriu Aileu, alargamentu kuartél jerál PNTL Caicoli, konstrusaun aeroportu Comoro, Arte Moris no Gembel) dalaruma hamosu presepsaun ida iha públiku katak, rede ba rai ou organizasaun sosiedade sivíl sira mak sempre impede lala’ok dezenvolvimentu.

Nia klarifika katak, ida-ne’e la loos no komunidade barak mak sente katak, sira iha forsa bainhira Estadu atu foti rai komunidade ba dezenvolvimentu, nune’e komunidade mai rejistu kazu iha rede ba rai no husu tulun hodi akompaña sira iha parte jurídiku tanba rede ba rai eziste ho ekipa legál  ne’ebé kompostu hosi advogadu-sira.

“Nune’e, nu’udar organizasaun sosiedade sivíl husu instituisaun Estadu no mós públiku atu labele iha presepsaun ida katak, organizasaun sosiedade sivíl maka sempre impede dezenvolvimentu,’’ nia hateten.

Rede ba rai sempre sai nu’udár parseiru hosi instituisaun Estadu liuhosi submisaun, rezultadu monitorizasaun no relatóriu peskiza-sira ne’ebé publika, hakarak atu fó tulun ba Estadu, hodi bele implementa dezenvolvimentu tuir lei no labele halo povu sai vítima, ba dezenvolimentu ne’e rasik.

Iha fatin hanesan, koordenador Nasionál rede ba rai, Hortencio Pedro Vieira, hateten opiniaun  ka persepsaun ne’ebé mosu iha públiku, ne’e dezvaloriza fila-fali sira-ninia serbisu advokasia.

Relasiona ho sidadade universitáriu Aileu, Governu tau ona orsamentu atu fó indimizasaun ba komunidade afetadu, maibé tenke iha konkordánsia hosi komunidade afetadu, tanba daudaun seidauk iha konkordánsia.

“Komunidade hela iha ne’ebá la’ós okupante, maibé sira na’in ba rai eransa  ne’ebé komprova ho dokumentu kompletu. Sira-nia ejizénsia mak rai Aileu la’ós iha fatin Mantame ne’e de’it, ne’ebé planu atu harii univesridade ne’e ona, maibé iha rai seluk luan loos hanesan Mosadu ho ektare 66 ne’ebé  komunidade oferese hanesan,’’ nia dehan.

Advogadu hosi rede ba rai, Júlio da Silva, esplika iha prosesu lei númeru 13/2017 ko’alia kona-bá rezime espesiál ba definisaun titularidade bens moveis, bainhira atu identifika se mak na’in ba rai, maka liuhosi prosesu ida bolu levantamentu kadastru.

Liu hosi levantamentu ema ne’ebé sente sira mak na’in parsela rai iha terrenu, tenke halo deklarasaun  iha rejistu iha Serbisu Nasionál Kadastru ne’ebé halo ona iha Aileu katak, komunidade afetadu mak rejistu nu’udár deklarante, nune’e momentu ne’ebá laiha reklamasaun hosi ema seluk inklui Estadu.

Hafoin ne’e, halo publikasaun mapa mós laiha reklamasaun ruma hosi parte ruma, signifika provizóriu sira mak nu’udar na’in.

“Rai afetadu, ami uma-ka’in ualu kompostu hosi 31 parsella,  no ami kontente hakarak simu dezenvolvimentu  ho insiativa Governu nian, maibé ami la satisfás de’it to’o agora hakarak foti hotu ami nia hela fatin ba rai ne’ebé ami utiliza durante ami nia avo beiala hosik hela, iha alternativu seluk hato’o parte Governu ne’ebé  ba halo sosializasaun dala 14 ona seida’uk iha konkordánsia,” nia subliña.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here