Koordenadór Rede ba Rai, Pedrito Vierano abitante uma kain 11 ko'alia ba jornalista sira, hafoin hato'o keixa ba Komisaun A (Justisa no Konstitusionál), iha Parlamentu Nasionál, kuarta ne'e. Imajen TATOLI/Evaristo Soares Martins

DILI, 24 fevereiru 2021 (TATOLI)—Rede ba Rai no abitante uma-kain 11 ne’ebé afetadu ba projetu konstrusaun Kuartél Jerál Polísia Nasionál Timor-Leste (PNTL), tersa ne’e, keixa Ministru Justisa (MJ) Manuel da Costa Cárceres ba Komisaun A ne’ebé trata asuntu Justisa no Konstitusionál.

Notísia Relevante: Rede ba Rai loke prosesu legál hasoru Ministru Manuel Cárceres

Kazu disputa rai entre komunidade ho Estadu ne’e akontese iha aldeia 01, Suku Caicoli, Postu Administrativu Vera Cruz, Munisípiu Dili.

Organizasaun Rede ba Rai lori abitante uma-kain 11 ne’e hasoru malu ho Komisaun A atu konsidera direitu balu ne’ebé lei proteje.

Prezidente Komisaun A, Deputadu Joaquim dos Santos ‘Boraluli’ haktuir uma-kain 11 ne’e la kontra Governu atu halo dezenvolvimentu maibé desizaun polítika ne’ebé Governu foti tenke tuir lei.

Tanba, tuir nia, bainhira Governu deside atu hasai sidadaun sira-nia direitu hela-fatin iha Konstituisaun RDTL artigu 54 númeru 3 katak ‘atu hetan eh hasai ema ida-nia propriedade privada hodi halo ba uzu públiku, tenke selu indeminizasaun loloos ba sidadaun.

“Ita-nia Governu liuhosi Ministériu Justisa hakarak hasai sidadaun sira-nia direitu kona-ba hela-fatin para atu halo fali konstrusaun komandu PNTL nian. Komisaun A hanoin hela atu rona tán Ministériu Justisa iha tempu oin mai molok komisaun A halo paresér ba parlamentu,” Prezidente Komisaun A informa ba jornalista sira, hafoin hasoru malu ho organizasaun Rede ba Rai no reprezentante uma-kain 11, iha Parlamentu Nasionál, kuarta ne’e.

Nune’e mós noifikasaun despezu administrativu hosi Ministériu Justisa liuhosi Diresaun Nasionál Terras no Propriedade (DNTP) labele viola lei numeru 13/2017 kona-ba Rejime Espesiál ba Definisaun Titularidade Bein Imovel.

Entretantu Koordenadór Nasionál Rede Ba Rai (RBR), Pedrito Vieira, hateten keixa polítika ne’e ba Komisaun A atu fó solusaun tanba desizaun Governu nian la justu.

“Ami mai hasoru Komisaun A atu bolu atensaun ba Ministru Justisa no Diresaun Nasionál Terras no Propriedade katak bainhira atu implementa projetu ruma tenke tuir regra konstitusionál ne’ebé vigora iha ita-nia rain. Tanba, kazu ne’e akontese dezde 2013 tanba abitante uma-kain 11 hasoru presaun atu husik sira-nia hela fatin. Ohin, ami sente kontente tanba Komisaun A sei halo ajendamentu hodi bolu Ministru Justisa hodi esplika aktu Governu nian ba parlamentu,” Koordenadór Rede ba Rai ne’e hateten.

Nia fundamenta, razaun abitante uma-kain 11 ne’e la fó rai ba governu tanba durante tinan barak halo negosiasaun, maibé laiha solusaun ka konkordánsia ruma kona-ba folin rai, uma no ai-horis  sira.

Durante prosesu negosiasaun ne’ebé mak realiza dala barak ho maneira presaun psikolojia hodi la promove prinsipiu negosiasaun nune’e la hamosu akordu ruma entre Governu ho komunidade rai na’in.

Nia konsidera notifikasaun despezu administrativu hosi Ministériu da Justisa/DNTP  aktu ilegál no viola konstituisaun RDTL artigu 54 numeru 1 no 3, viola lei númeru 13/2017 kona-ba Rejime Espesiál ba Definisaun Titularidade Bein Imovel no viola prinsípiu Estadu Direitu.

Tuir Konstituisaun RDTL artigu 54 (Direitu ba propriedade privadu) alínea 1 hateten, ema hotu-hotu iha direitu ba propriedade privada no bele fó ba ema seluk wainhira sei moris no mós wainhira mate, tuir lei nia lala’ok.

Alínea 2 hosi Konstituisaun RDTL ne’e mós akresenta, labele uza propriedade privada hodi estraga fali nia funsaun sosiál.

Alínea 3 hosi artigu 54 ne’e subliña, atu hetan eh hasai ema ida nia propriedade privada hodi halo ba uzu públiku, tenke selu indeminizasaun loloos ba sidadaun, tuir lei haruka.

Alínea 4 hatutan, ema sidadaun nasionál de’it mak bele iha direitu ba propriedade privada sidadaun nian.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here