Plenaria Parlamentu Nasional. Imajen Tatoli Antonio Goncalves.

DILI, 03 agostu 2021 (TATOLI)—Governu liuhosi Ministériu Ensinu Superiór, Siénsia no Kultura (MESSK), esplika mekanizmu implementasaun propina liu-liu kona-bá izensaun propina ba esninu superiór nian kompostu hosi universidade públiku no privada sira ba Parlamentu Nasionál (PN).

Notísia Relevante: PN husu loke investigasaun ba implementasaun subsídiu propinas

Ministru Ensinu Superiór, Siénsia no Kultura, Longuinhos dos Santos, esplika orsamentu ne’ebé mak prevee ka konsta iha Fundu COVID-19 ho valór millaun $14 no totál estudante ne’ebé sai hanesan benefísiariu 64,589 hosi instituisaun ensinu superiór tantu públiku no privada sira hamutuk instituisaun 18.

“Ha’u hakarak informa iha prosesu ba implementasaun katak primeiru hosi MESSK akumula dadus hosi instituisaun ensinu superiór, tantu públiku no privada sira. Dadus refere presiza hetan asinatura ka koñesimentu hosi magnífiku-reitór sira, nune’e tuir mai dadus hirak-ne’e konfere hotu hetan verifikasaun hosi MESSK. Depois mak halo akordu hamutuk ho instituisaun ensinu superiór sira,” Ministru Longuinhos dos Santos, esplika liuhosi plenária, tersa ne’e.

Kona-bá Komisaun F Parlamentu Nasionál ne’ebe halo monitorizasaun no fiskalizasaun ba implementasaun medida ne’e no hato’o mós kona-ba kalenderizasaun ba implementasaun izensaun propinas ne’e.

Nia argumenta, artigu 16 hosi Lei númeru 8/2021, ne’ebé aprova iha loron 3 fulan-maiu kona-ba Orsamentu Jerál Estadu 2021 ne’ebé aprova medida kona-ba sósiu-ekonómiku nian, ne’ebé aprova mós medida izensaun propinas ba instituisaun ensinu superior sira tantu públiku no privada.

Hosi ne’e, nia dehan, MESSK lori dokumentu hirak-ne’e submete ba Ministériu Finansa prosesa liuhosi Fundu COVID-19 ne’ebé sentraliza iha Ministériu Finansa.

Governante ne’e fó-sai katak, Ministériu Finansa transfere orsamentu ne’e iha loron 14 to’o loron 15 fulan-jullu, halo transferénsia ba konta universidade hotu-hotu, tantu universidade públiku no privada sira.

Ikus mai, iha loron 90 nia laran universidade sira implementa medida hirak-ne’e hahú hosi loron 16 fulan-jullu to’o loron 15 outubru 2021, maibé fó tempu tán loron 15 atubele halo relatóriu ba iha MESSK ne’ebé hahú hosi loron 15 outubru to’o loron 31 fulan-outubru.

Deputadu Bankada Congresso Nacional de Reconstrução de Timorense (CNRT), Gabriel Soares, hateten implementasaun iha terrenu deteta katak parlamentu aprova osan $150 kada estudante inskritu.

“Maibé ezekusaun iha terrenu latuir saida maka deputadu sira aprova iha uma fukun ida-ne’e. Sé ita fó $30 ba estudante sira iha UNTL, entaun $120 ba tau iha-ne’ebé. Iha UNPAZ ba halo pagamentu $110 entaun $40 dolar ba tau iha-ne’ebé,” Deputadu Bankada CNRT ne’e preokupa.

Hatán ba preokupasaun ne’e, Ministru Longuinhos dos Santos, hateten Lei númeru 8/2021 iha artigu 16 kona-ba regulamentu prosedimentu izensaun pagamentu propinas ba estudante ensinu superiór nasionál ho medida apoiu estraordináriu, katak estudante sira-ne’ebé rejistu ho valór másimu $150.

“Signifika, ita atu halo pagamentu ba universidade sira, ezemplu UNTL $30 kada trimestrál tanba lei autoriza de’it valór másimu $150. Restu ne’e responsabilidade hosi inan-aman entaun prezensa Governu nian atu hakmaan inan-sira,” nia fundamenta.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here