Postu integradu fronteira Batugade, kinta (24/06/21). Imagen Tatoli/Sérgio da Cruz.

BOBONARO, 23 juñu 2021 (TATOLI)—Hahú hosi janeiru to’o maiu, autoridade Aduaneira Postu Integradu Fronteira Batugade, hatama reseita ba kofre Estadu hamutuk $195.639,41.

Alende ne’e, reseita iha fulan juñu to’o data ohin-nian provisoriamente hamutuk $49.003,30, ho totál $244.642,77.

Notísia relevante:Janeiru-abríl, Alfándega rekolla reseita doméstika millaun $12-resin

Diretór Alfándega, Alberto Seixas, esplika reseita hirak-ne’e barak liu mai hosi sasán importasaun-nian hosi Indonézia mai Timor-Leste (TL), inklui sasan esportasaun hosi TL ba Indonézia hanesan kamí no sasan seluk-tán.

“Tinan ne’e, Alfándega hatama reseita menus, tanba pandemia COVID-19, maibé tinan kotuk hahú hosi janeiru to’o fevereiru konsege hatama to’o $766.126,36,” Alberto Seixas hateten  ba jornalista Agência Tatoli, iha postu integradu fronteira Mota-ain, kinta ne’e.

Durante periúdu COVID-19, funsionáriu Autoridade Aduaneira Postu Batugade na’in 24 serbisu hanesan bai-bain, maibé atendimentu ba sasán importadu-sira  loke de’it semana ida dala ida.

Tuir oráriu, sasán sira ne’ebé tama iha kuarta, ekipa sei halo pasa revista no kamioneta sira foin tama ba Dili ho Maliana iha kinta, hafoin iha segunda fila-fali ba Indonézia, ho troka kondutór iha riska kinur fronteira Timor-Leste ho Indonézia.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here