Ministru Koordenadór Asuntu Ekonómiku (MKAE), Joaquim Amaral. Imajen TATOLI/Francisco Sony

DILI, 03 agostu 2021 (TATOLI)--Governu liuhosi Ministériu Koodenadór Asuntu Ekonómiku (MKAE) no ministériu responsável sira hahú verifika lista reklamante Cesta Bázika hodi bele halo distribuisaun.

“Programa distribuisaun Cesta Bázika termina ona, ne’ebé faze agora ita foku ba reklamante sira, liuliu populasaun balun ne’ebé naran laiha no seidauk simu. Ami ho ministériu implementadór sira no Ministériu Administrasaun Estatál (MAE) daudaun ne’e verifika hela atu rezolve iha tempu besik,” Ministru Koodenadór Asuntu Ekonómiku, Joaquim Amaral, hateten iha edifísiu Ministériu Turizmu, Komérsiu no Indústria (MTKI), Mandarin, tersa ne’e.

Benefisiáriu ne’ebé simu ona Cesta Bázika hamutuk ema millaun 1,3 resin ona ka reprezenta 91,8% hosi totál benefisiáriu millaun 1,5, ne’ebé falta reklamante hamutuk 25.000 inklui balun ne’ebé laiha naran iha lista mak seidauk simu produtu Cesta Bázika.

MTKI ne’ebé área distribuisaun iha munisípiu Dili no área urbana sira, responsável ba reklamante 25.000 hosi ema hamutuk 19.000 no reklamante 6.000 seluk responsável hosi Ministériu Agrikultura no Peska (MAP) no Sekretaria Estadu Kooperativa (SEKoop).

“Ami ho ministériu implementadór sira no Ministériu Administrasaun Estatál, liuhosi autoridade lokál no líder komunitáriu sira verifika ema sira ne’ebé naran laiha,” nia akresenta.

Governante ne’e konsidera MAE mak hanesan odamatan atu rezolve problema reklamante sira ne’ebé seidauk simu Cesta Bázika, nune’e nia husu ba komunidade ne’ebé seidauk simu Cesta Bázika, presiza aprezenta-an ba autoridade lokál hanesan Xefe aldeia no Xefe suku to’o mai munisípiu to’o MAE, hafoin submete ba MKAE atubele hatama ba lista reklamante hodi bele hetan direitu.

“Ami daudaun esforsu hela atu rezolve Cesta Bázika ba reklamante sira, espera ministériu implementadór sira bele rezolve lalais reklamante,” nia subliña.

Notísia relevante: MF halo ona pagamentu Cesta Bázika ba kompañia lokál 102

Iha sorin seluk, Ministériu Finansa (MF) realiza ona pagamentu ba kompañia fornesedór Cesta Bázika hamutuk 102 ho montante millaun $26,3 resin ne’ebé antes ne’e selebra kontratu ho ministériu implementadór.

Totál orsamentu ba programa Cesta Bázika hamutuk millaun $82, ba totál benefisiáriu millaun 1,5 iha territóriu tomak, tuir lista atuál hosi MAE.

Jornalista : Florêncio Miranda Ximenes

Editora    : Julia Chatarina

HAKEREK NO HATÁN

Please enter your comment!
Please enter your name here