Komunidade suku Manleuana, postu adminisrativu Dom Aleixo, troka voucher ho produtu Cesta Bázika iha supermerkadu Leader, tersa (09/02). Imajen Tatoli/António Gonçalves.

DILI, 04 maiu 2021 (TATOLI)-Ministériu Finansa (MF) liuhosi Sekretariadu Tékniku Fundu COVID-19, halo ona pagamentu Cesta Bázika ba kompañia lokál hamutuk 102 ho valór $26.354.515.

Totál pagamentu ne’e, mai hosi pedidu pagamentu Ministériu Turizmu Komérsiu no Indústria (MTKI) hamutuk 50 ho totál $10.635.966, Sekretaria Estadu Kooperativa (SEKoop) hamutuk 24 ho totál $12.498.312, Sentru Lojíztika Nasionál (CLN, sigla portugés) hamutuk 21 ho totál $2.027.558, no pedidu pagamentu hitu hosi Ministériu Agrikultura no Peska (MAP) ho montante $1.192.678.

Aleinde ne’e, MF haruka filafali pedidu pagamentu haat ba MAP atu kompleta rekezitu pagamentu tuir lei molok realiza pagamentu.

“Sekretariadu Tékniku Fundu COVID-19 kontinua serbisu hamutuk ho ministériu implementadór atu konklui pagamentu ba kompañia sira ne’ebé mak fornese ona ai-han ba programa Cesta Bázika, tanba ne’e, ho promulgasaun Lei Orsamentu Jerál Estadu (OJE) Retifikativu hosi Prezidente Repúblika, lori mudansa iha dotasaun orsamentál lubun ida inklui dotasaun Fundu COVID-19,” relata nota imprensa ne’ebé Agência TATOLI asesu, tersa ne’e.

Notísia relevante: MF finaliza ona pagamentu 94 ho montante millaun $25

Nota ne’e haktuir, iha dotasaun Fundu COVID-19 ne’ebé ho montante inisiál $31.000.000 hetan ona reforsu $256.641.793, nune’e ninia totál hamutuk $287.641.793.

“Aumentu dotasaun Fundu COVID-19 fó biban ba Governu hodi aloka millaun $34,5 hodi sosa vasina COVID-19 atu nune’e bele kobre populasaun tomak, sosa materiál no ekipamentu ba protesaun individuál no materiál hodi halo teste no tratamentu ba pasiente COVID-19 iha internamentu, konstrusaun no aluga fatin izolamentu no kuarentena, inklui hadi’a fasilidade sira iha fatin izolamentu iha teritóriu laran tomak,” refere nota hos MF.

Alterasaun dotasaun Fundu COVID-19, fó biban ba Governu hodi finansia medida sosio-ekonómiku hanesan apoiu ba empregu millaun $45,3, moratória kréditu millaun $2, izensaun pagamentu propina ba estudante ensinu superiór millaun $14, subsídiu internet ba estudante ensinu superiór millaun $2,2, sosa produtu alimentár hosi produtór lokál millaun $12.

Nune’e mós, subsídiu ba eletrisidade, finansia operasaun Sala Situasaun-Sentru Integradu Jestaun Krize (SS-CIGC, sigla portugés) millaun $16,7, finansia suplementu remuneratóriu ba traballadór liña frente millaun $51,9, no konklui pagamentu ba programa Cesta Bázika millaun $31.

MF fó hanoin, bainhira dokumentu pedidu pagamentu kompletu, loos no prienxe ona rekezitu pagamentu tuir lei haruka, Sekretariadu Tékniku Fundu COVID-19 sei prosesa no sei realiza pagamentu tuir regra ne’ebé vigora.

Maibé, molok Sekretariadu Tékniku Fundu COVID-19 realiza pagamentu, kompañia sira hotu tenke kumpre dever hodi selu impostu rendimentu/income tax 0,5% hosi totál rendimentu konforme Lei Tributária haruka.

“Kompañia sira tenke aprezenta sira-nia resibu pagamentu impostu rendimentu ba Sekretariadu Tékniku Fundu COVID-19 atu nune’e bele realiza pagamentu finál,” subliña nota hosi MF.

Karik kompañia fornesedór-sira iha pergunta ruma ka presiza informasaun liután kona-ba asuntu impostu, bele kontaktu Autoridade Tributária (AT) ka vizita portál https://attl.gov.tl/ relasiona ho pagamentu impostu, submisaun relatóriu mensál/annuál inklui pedidu emisaun ba Certidão de Dívidas.

Pagamentu impostu mós bele halo liuhosi mákina ATM P24 no kontribuinte sira la presiza ba forma tan iha banku komersiál sira hanesan uluk.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here