Komandante PNTL munisípiu Ermera, Superintendente, Ludgério Lay. Imajen facebook.

DILI, 02 agostu 2021 (TATOLI)—Polísia Nasionál Timor-Leste (PNTL), detein ona suspeitu OM, ne’ebé deskonfia baku Diretór Saúde munisípiu Ermera, António Fatima de Deus, iha Gleno, domingu (01/08/21) kalan.

Komandante PNTL munisípiu Ermera, Superintendente, Ludgério Lay, hateten akontesimentu ne’e mosu tanba iha dezintendimentu, bainhira ekipa saúde nasionál hosi Dili atu ba transporta pasiente COVID-19 ne’ebé deteta hamutuk na’in- 20 maioria labarik.

Notísia relevante: Governu impoin konfinamentu domisiliáriu jerál iha postu administrativu rua iha Ermera

“Iha pasiente ida ho idade 11, parte família la aseita atu ekipa saúde foti. Maibé, ekipa halo aprosimasaun katak, atu labele iha diskriminasaun pasiente hotu-hotu presiza foti hodi izola atu labele hada’et  tan virus ba ema seluk. Nune’e, família la satisfás mosu dezintendimentu to’o tuku hasoru diretór serbisu saúde,” Ludgério Lay, hateten ba jornalista Agência Tatoli via telefónika, segunda ne’e.

Komandante ne’e seidauk fó-sai kona-bá rezultadu hosi asaun suspeitu hasoru vítima, tanba sei iha prosesu identifikasaun.

“Oras-ne’e daudaun ita detein hela suspeitu iha sela hodi halo identifikasaun,” nia esplika.

Bainhira konklui identifikasun komandu sei halo auto-notísia ba Ministériu Públiku (MP), hodi halo prosesu tuir dalan legál.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here