Prezidente Institutu Nasionál Seguransa Sosiál (INSS), Longuinhos Armando Leite. Imajen Tatoli/Francisco Sony.

DILI, 22 juñu 2021(TATOLI)—Prezidente Konsellu Administrasaun Institutu Nasionál Seguransa Sosiál (INSS), Longuinhos Armando leite, informa iha loron 01 fulan-jullu INSS sei hahú halo pagamentu ba entidade empregadór no fakultativu 9.000-resin.

Notísia Relevante: INSS verifika ona dadus empregadór 5.516

“Institutu Nasionál Seguransa Sosiál sei halo pagamentu ba entidade enpregadór no fakultativu sira hamutuk 9.000-resin, iha loron 01 fulan-jullu tinan ne’e,” Prezidente INSS ne’e informa ba Ajénsia TATOLI, iha nia knaar fatin, Caicoli, Dili, tersa ne’e.

Totál ema 9.000-resin ne’e maihosi entidade empregadór no fakultativu foun sira inklui sira-ne’ebé rejistu tuan

Prezidente INSS ne’e husu benefisiáriu sira-ne’ebé mak rejistu no hatama ona dokumentu iha INSS maibé seidauk bolu atu halo verifikasaun ne’e, tenke atu pasiénsia tanba INSS konklui hotu verifikasaun ba dokumentu sira-ne’e mak sei bolu benefisiáriu ida-idak.

Tuir lei hosi subsídiu sira-ne’e, hotu-hotu iha ona nia pursentu mak hanesan apoiu ordináriu ne’ebé liuhosi ema-nia konta 70% hosi sira-nia saláriu, subsídiu extraordináriu hosi ema-nia konta rasik 85%, apoiu subsídiu ba dezempregu katak ema sira para hosi sira-ne’e servisu Governu sei selu 40% hosi sira-nia saláriu, apoiu subsídiu ba eletrisidade ba empreza sira 50% hosi totál gastu no 30% ba arrendamentu.

“Ha’u husu bebeik katak hahú hetan apoiu ida-ne’e ba empreza foun no ita-nia maluk negósiante foun sira ita loke loron 15 de’it para bele mai rejistu ka adere ona iha seguransa sosiál. Tuir lei mós, depois loron 15, ita tenke taka, tanba ne’e iha 27 maiu ita taka ona. Maibé, ba empreza tuan sira ita kontinua loke no simu nafatin to’o juñu nia rohan.” nia dehan.

Karik to’o iha tempu ne’ebé determina iha lei ne’e mak sira lai mai rejistu ba empreza foun, sira nafatin lahetan apoiu. Ba empreza tuan sira ne’ebé rejistu nanis ona to’o iha juñu nia rohan mak sira la mai rejistu, entaun sira mós labele hetan sira-nia direitu tanba la rejistu.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here