Sekretáriu Estadu ba Asuntus Kombatentes Libertasaun Nasionál, Gil da Costa Monteiro 'Oan Soru'. Imajen TATOLI/Egas Cristóvão

DILI, 02 agostu 2021 (TATOLI)–Sekretáriu Estadu Asuntu Kombatente no Libertasaun Nasionál (SEACLN, sigla portugés), Gil da Costa Monteiro ‘Oan Soru’, hateten, fundu investimentu veteranu to’o fulan-jullu 2021 ne’e akumula ona fundu hamutuk millaun $15.

Investimentu fundu hahú hosi fulan-janeiru 2020 to’o agora, ne’ebé kada fulan Ministériu Asuntu Kombatente Libertasaun Nasionál hanesan ministériu implementadór programa, ko’a osan $30 hosi kada veteranu, ho totál veteranu ne’ebé sai benefisiáriu hamutuk 27.000 resin, hodi depozita ba Banku Nasionál Komérsiu Timor-Leste (BNCTL, sigla portugés).

Notísia relevante: SEACLN Esklarese Governu Ko’a Veteranu Nia Osan $30.00

“Durante ko’a osan kada veteranu di’ak hela no osan iha fundu hamutuk millaun $15. Ita ko’a osan tanba bainhira ko’alia kona-ba sustentabilidade tenke kontribui iha parte ruma,” Oan Soru relata hafoin ramata reuniaun ho Primeiru-Ministru (PM), Taur Matan Ruak, iha Rezidénsia ofisiál Farol, segunda ne’e.

Tuir nia, polítika Governu mak atu garante sustentabilidade ba veteranu sira, ne’ebé atu transforma ba investimentu ida hodi husik ba veteranu sira-nia oan iha futuru.

Antes implementa polítika ne’e, SEACLN hala’o ona sensibilizasaun ba veteranu benefisiáriu iha munisípiu hotu hodi hetan aseitasaun.

Nune’e mós, liuhosi kongresu konsellu nasionál kombatente libertasaun nasionál dahuluk aprova deliberasaun númeru 01, iha loron 21 dezembru 2019, hodi fó kbiit ba SEACLN hodi hahú implementa polítika kriasaun fundu investimentu ba veteranu.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here