Sekretariu Estadu Asuntu Kombatantes no Libertasaun Nasionál, Gil da Costa Monteiro "Oan Soro". Imajen/Eugénio Pereira

DILI, 30 janeiru 2020 (TATOLI) – Iha loron hirak ikus ne’e veteranu sira, inklui reprezentante povu nian iha Uma Fukun Parlamentu Nasional (PN) kestiona no husu klarifikasaun ba governu kona-ba razaun fundamentu ko’a veteranu sira nia osan subsídiu $30.00 kada fulan.

Notísia relevante : Xefe Estadu Fiar Konsellu Veteranu Sei Ajuda Estadu Dignifika Eroi Sira

Responde ba preokupasaun sira ne’e, Sekretáriu Estadu Antigu Kombatente Libertasaun Nasionál (SEACLN), Gil da Costa Monteiro  ‘Oan Soro’, klarifika katak, hahú janeiru 2020, Governu ko’a kada veteranu nia osan ho valor $30.00 hodi kontribui ba kriasaun fundu investimentu ba veteranu atu garante sustentabilidade fundu ba veteranu sira iha futuru.

“Janeiru, tinan ne’e, veteranu rihun 27-resin iha territóriu sei ko’a sira nia osan direita iha Banku Nasional Komérsiu Timor-Leste (BNCTL) ho valor $30.00 hodi rai ba kriasaun fundu investimentu veteranu,” informa Gil Oan Soro, ohin, ba  Ajénsia TATOLI iha nia servisu fatin Caicoli, Dili.

Nia esplika, polítika governu nian ne’e atu garante sustentabilidade ba veteranu, liu-liu atu transforma ba investimentu ida hodi husik hela ba jerasaun veteranu sira nia oan iha futuru.

“Ita veteranu uluk luta ba rai ida ne’e hodi hetan ukun-aan, tanba ne’e hahú agora ita tenke kria hela kondisaun bainhira ita mate husik hela buat di’ak ruma ba ita nia oan sira,’’ Oan Soro afirma.

Nia esplika, husi osan ne’ebé Governu bele hala’o fali hanesan modelu banku veteranu, maibé buat sira ne’e hotu daudaun sei iha diskusaun no pesoál téknika sira komesa halo preparasaun téknika.

Antes ne’e implementa polítika ne’e, SEACLN hala’o ona sensibilizasaun ba veteranu hotu iha munisípiu hotu no iha nasionál ne’ebé sai benefisiáriu simu pensaun husi Estadu hodi hetan aseitasaun. Nune’e mós liu husi Primeiru kongresu konsellu nasionál kombatente libertasaun nasionál aprova deliberasaun númeru 01 primeira kongresu CLN iha loron 21 dezembru 2019 hodi fó kbiit ba iha SEACLN hahú implementa polítika kriasaun fundu investimentu ba veteranu.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here