Grupu Arte Marsiál (GAM) halo asaun dame no simu malu hodi estabelese akordu juramentu, hakribi violénsia, promeve paz iha suku Kairui, postu administrativu Laleia, munisipiu Manatuto, (10/07/21). Imajen/DNPKK.

DILI, 02 agostu 2021 (TATOLI)—Diresaun Nasionál Prevensaun Konflitu Komunitária (DNPKK), hosi Sekretária Estadu Protesaun Sivíl (SEPS) hamutuk ho UN Women, define ona implementasaun programa kapasitasaun ba mediadór-sira iha munisípiu.

Komunikadu ne’ebé Agência Tatoli asesu iha segunda ne’e, Diretór DNPKK, António Viegas, akompaña hosi Xefe Departamentu Rezolusaun Konflitu, Julião Fernandes no Xefe Seksaun-sira hala’o sorumutu ho UN WOMEN, hodi define implementasaun programa hosi fulan agostu to’o dezembru 2021.

Notísia relevante:DNPKK sensibiliza membru PNTL kona-bá prevensaun konflitu

Definisaun programa iha enkontru dahuluk ne’ebé atu implementa maka, fó kapasitasaun ba mediadór-sira hosi munisípiu 12 inklui Rejiaun Administrativa Espesiál Oe-cusse Ambeno (RAEOA).

Alende ne’e, sei oferese mós formasaun ba Polísia Nasionál Timor-Leste (PNTL), refreshing training ba fasilitadór DNPKK iha munisípiu Dili no ko’alia mós apoiu koordenadora projetu iha área mediasaun.

Antes ne’e, iha 28 jullu 2021, SEPS ho UN Women asina ona akodu implementasaun PAN 1325 FPS ba faze daruak.

Akordu ne’e asina direta hosi  SEPS, Joaquim Gusmão ho UN WOMEN hodi apoiu fundu  rihun $60 ba DNPKK ba implementasaun ‘programa harii sistema mediasaun seguru no edukativu iha Timor-Leste’ (mediasaun sensível ba jéneru no PAN 1325 kona-bá feto, pás no seguransa (FPS) ba faze daruak).

Projetu ne’e finansia hosi Governu Swedia liu hosi UN  Women, atu fó apoiu hodi dezenvolve Planu Asaun Nasionál (PAN) 1325 liu-liu komitmentu Governu-nian atu asegura ajenda feto, pás no seguransa iha TL.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here