Diresaun Nasionál Prevensaun Konflitu Komunitária-Ministériu Interiór (MI) ho Plan Internasionál, oferese treinamentu ba ajente polísia komunitária no polísia tránzitu kona-bá jestaun emosaun, prevensaun konflitu no protesaun labarik, iha salaun MI, (23/06). Imajen Tatoli/Francisco Sony.

DILI, 23 juñu 2021 (TATOLI)—Sekretária Estadu Protesaun Sivíl (SEPS), liuhosi Diresaun Nasionál Prevensaun Konflitu (DNPKK), serbisu hamutuk ho Plan Internasional hala’o sensibilizasaun  kona-bá jestaun emosaun, prevensaun konflitu no protesaun labarik, ba ajente polísia komunitária ho membru unidade Tránzitu.

SEPS, Joaquim Gusmão, hateten objetivu hosi sensibilizasaun ne’e tanba tinan ida resin ona Timor-Leste (TL) enfrenta situasaun COVID-19 no dezastre naturál, hamosu presaun makaas, nune’e membru seguransa-sira mós halo atuasaun iha terrenu ho emosaun.

Notísia relevante:DNPKK fó formasaun ba estrutura suku Bairru-Pité

“Inisiativa ida-ne’e atu bele fó formasaun ba ajente polísia ne’ebé loro-loron hamutuk ho komunidade liga ba prevensaun konflitu atu bele responde ho mekanizmu oinsa hamenus  atuasaun-sira  uza emosaun,” Joaquim Gusmão, hateten ba jornalista-sira, iha salaun Ministériu Interiór (MI), kuarta ne’e.

Iha fatin hanesan, Komandante Polísia Nasionál Timor Leste (PNTL), munisipiu Dili, Superitendente Xefe, Henrique da Costa, konsidera atividade ne’e hanesan parte ida  atu kapasita liu tan membru-sira, oinsá jere serbisu atendementu iha terrenu.

“Ita boot-sira hala’o serbisu direta ho komunidade, tanba ne’e, sensibilizasaun ne’e importante,” nia hateten.

Nia husu ba membru-sira atu aproveita oportunidade ne’e ho di’ak durante sensibilizasaun nune’e bele aplika duni iha terrenu.

Henrique da Costa agradese ba DNPKK ho Plan Internasional  ne’ebé realiza sensibilizasaun ne’e durante loron ida ne’ebé partisipa hosi membru PNTL na’in 15.

Plan Internasionál apoiu rihun $12

Plan Internasional iha Timor-Leste mak fó apoiu rihun $12 ba SEPS, liu hosi DNPKK, hodi realiza atividade sensibilizasaun ba prevensaun konflitu durante 2021.

Country Diretor Plan Internasionál, Dilyana Ximenes, hateten ho  apoiu ne’e bele fasilita DNPKK hodi realiza atividade sira ne’ebé la’o tiha ona iha tinan ne’e hanesan diálogu, mediasaun ba konflitu hodi buka solusaun, fó formasaun foku ba igualidade jéneru, haree asuntu ba protesaun labarik  no defisiénsia ho inkluzaun oinsa iha família kria kondisaun atu proteze durante moris, hodi realiza sira-nia direitu ho di’ak ne’ebé implementa iha munisípiu Dili, Aileu no Ainaro.

Atividade ne’e kolobora direta ho autoridade lokál, lia-na’in, polísia komunitária durante sensibilizasaun no mediasaun ba konflitu iha suku sira ne’ebé identifikadu hodi kontribui ho paz no dame iha komunidade.

Tuir planu Plan Internasionál iha  tinan oin sei  apoia tan rihun $20 ba DNPKK hodi kontinua realiza atividade ne’e.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here