Minsitériu Saúde, sábadu ne’e fahe pakote saúde ijiene pesoál hamutuk 680 ba vitima afetadu insendiu Comoro. Imajen Tatoli/Felicidade Ximenes.

DILI, 31 jullu 2021 (TATOLI)—Minsitériu Saúde, sábadu ne’e fahe pakote saúde ijiene pesoál hamutuk 680 ba vitima afetadu insendiu Comoro ne’ebé apoiu hosi parseiru Plan Internationál hanesan sabaun, pepsodente, sampho, máskara no seluk tan. 

Minsitra Saúde Odete Maria Freitas Belo hateten, iha loron 29 madrugada ahi han komunidade lubuk nia uma iha eis merkadu Comoro entaun Ministériu Saúde nia papel atu haree ba iha ema sira-ne’ebé mak vulneravel liu-liu ba labarik sira, inan isin-rua no katuas-ferik sira.

Notísia Relevante: Vítima Inséndiu Comoro Agradese Tratamentu Saúde Gratuita

“Ami mai ne’e, ami la lori hahan maibé oinsá mak ami fó asisténsia saúde ba sira. Ita hotu hakarak sira-nia kondisaun saúde di’ak nafatinm atu nune’e sira bele moris ho kondisaun ne’ebé mak seguru,’’ Odete Maria Freitas Belo hateten ba jornalista sira iha aldeia 03, suku Fatuhada Postu Adminsitrativu Dom Aleixo, Dili. 

Aleinde ne’e, ekipa saúde mós kontinua fó tratamentu jerál liu-liu vasina sira la’ós ba vasina COVID-19 de’it maibé vasina rutina ba inan isin-rua no ba labarik kiik sira-ne’ebé mak foin moris.

Tanba, nia dehan, agora daudaun tama ona iha fulan agostu entaun ekipa saúde nia atividade rutina fó aimoruk lumbringa ba labarik idade tinan lima (5) mai kraik inklui mós fó vitamina A ba labarik sira.

Xefe Aldeia husu fó apoiu moskiteiru

Iha fatin hanesan, Xefe Aldeia 03, Suku Fatuhada, Zeferino Bras, husu ba Ministéiru Saúde (MS) atu fó apoiu hodi fahe moskiteiru ba vítima inséndiu Comoro tanba kada uma kain família barak no labarik ki’ik-oan barak.

“Tuir dadus katak labarik ki’ik-oan hosi tinan liman mai kraik iha 300-resin no inan isin-rua hamutuk 15, tanba ne’e ami husu ajuda ba Ministériu Saúde liu-liu apoiu moskiteiru para oferese ba iha uma kain sira. Tanba kada uma kain tenke hetan tolu ka haat, nune’e sira labele kona moras dengue no moras sira seluk,” Zeferino Bras, informa ba jornalista sira iha eis merkadu Comoro, sábadu ne’e.

Tanba, antes ne’e Ministériu Saúde fó ona moskiteiru ba uma kain ida hetan ida entaun ida-ne’e seidauk sufiesiente, tanba kada família iha oan barak.

“Se sira hetan de’it moskiteiru ida sira-nia oan no familia balun labele asesu hotu. Ida-ne’e mak ha’u relata ba Ministériu Saúde bele ajuda no mós ministériu ne’e,” nia dehan.

Hatán ba preokupasaun ne’e, Ministra Saúde Odete Maria Freitas Belo hateten ekipa saúde distribui ona maibé xefe aldeia husu nafatin entaun bele hetan tan adisionál ruma.

“Ita distribui horisehik maibé ita mós seidauk hatene iha uma kain ida ema na’in hira entaun ida ne’e mak ita tenki haree fila-fali tanba ita iha moskiteiru importante mak dadus mai fila-fali atu sira bele halo diskusaun no distribuisaun,’’  nia hateten.

Jornalista : Felicidade Ximenes

Editór       : Cancio Ximenes

HAKEREK NO HATÁN

Please enter your comment!
Please enter your name here