Korpu Bombeiru ho apoia husi komunidade sira halo intervnesaun hamate ahi ne'ebé han motuk kioske hamutuk 100-resin iha antiga Merkadu Comoro, Dili, 9 Dezembru 2019. Imajen/Antonio Goncalves

DILI, 17 dezembro 2019 (TATOLI) – Vítima inséndiu aldeia 03 Antigu Merkadu Comoro, suku Fatuhada, postu administrativu Dom Aleixo, munisípiu Dili, agradese ba Prezidénsia Repúblika ne’ebé servisu hamutuk ho organizasaun lokál, Saúde Ba Ema Hotu (SABEH) hodi oferese konsulta no tratamentu saúde gratuita. 

Vítima insénsiu, Gonçalo da Costa (42) ba Agência Tatoli hateten, hafoin inséndiu iha loron 9 dezembru, nia sofre moras matan tanba kona ahi suar maka’as.

Alende ne’e, nia kotuk laran moras maka’as tanba momentu akontese inséndiu, nia salva sasan barak, hiit sasan todan hanesan almáriu, jelera no seluk tan.

“Agradese ba Prezidénsia Repúblika liuhusi Xefe Kaza Sivíl no Espoza Prezidente Repúblika, ne’ebé antes ne’e mai to’o duni iha ami nia fatin, no ohin konsege servisu hamutuk ho SABEH hodi mai oferese tratamentu gratuita ba ami hirak ne’ebé sai vítima ba inséndiu”, tenik Gonçalo hafoin hetan tratamentu iha antigu merkadu Comoro.

Iha biban ne’e, Gonçalo nia oan ho idade tinan 2 ne’ebé mear no isin manas, bele hetan tratamentu gratuita.

Iha fatin hanesan Diretór Ezekutivu SABEH, doutór Andrezinho Belo, hateten SABEH hanesan organizasaun lokál, kompostu husi médiku voluntáriu sira, ne’ebé sempre prontu iha kualker situasaun atu ezekuta sira nia fó atendimentu saúde bázika ba komunidade.

Oportunidade hodi halo tratamentu saúde iha Comoro, tanba pedidu husi parte Prezidénsia Repúblika ne’ebé hanesan mós kontinuasaun husi tratamentu ba vítima inséndiu iha munisípiu Ermera.

“Ami husi SABEH sempre prontu atu atende komunidade ne’ebé presiza tratamentu saúde, liuliu sira ne’ebé susar duni atu asesu ba saúde bázika, maibé iha ne’e ami nia difikuldade maka ai-moruk la sufisiente. Ai-moruk ne’ebé la iha mak tensaun, mear no vitamina ba labarik”, Andrezinho relata.

Kona-ba tipu moras ne’ebé vítima inséndiu sira sofre, Andrezinho hateten, ema boot maioria sofre tensaun, ne’ebé ho nia kauza tanba trauma, hanoin barak, no estilu moris nian ne’ebé ladún hetan atensaun hanesan han no hemu la kontrola, enkuantu ba labarik sira maioria sofre infesaun respiratóriu no isin katar.

Totál númeru pasiente ne’ebé hetan tratamentu husi SABEH hamutuk na’in-149, kompostu husi labarik na’in-78 no ema boot mane na’in-32 no feto na’in-39.

Antes ne’e, Xefe Kaza Sivíl Prezidénsia Repúblika, Francisco Maria de Vasconcelos, hateten Prezidente Repúblika la’ós ezekutivu maibé iha responsabilidade morál atu fó apoiu ba kualker sidadaun, liuliu ko’alia nafatin hodi fó hanoin ba Governu atu apoia sidadaun sira ne’ebé presiza, inklui vítima inséndiu iha Antigu Merkadu Comoro.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here