Amostra hosi teste swab ne’ebé médiku-sira foti hosi komunidade. Imajen Tatoli/António Gonçalves.

DILI, 31 jullu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu pozitivu 154, rekoperadu 41 no kazu ativu 983.

Notísia Relevante: COVID-19, pozitivu 49 no ativu 870

“Kazu foun ohin 154 hosi Dili 34 no Munisípiu-Ermera 114 no munisípiu seluk hamutuk na’in-neen (6) ne’ebé kompostu hosi mane 77, feto 77,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liu hosi komunikadu imprensa, sábadu ne’e.

Hosi totál kazu detetadu foun ohin, ho idade 12 mai kraik na’in-hitu (7), idade entre tinan 12-59 na’in-143 (93,0%), idade 60 mai kraik na’in-haat (4) no hosi kazu detetadu foun ohin 64 (41,6%) sintomatiku (hatudu sintomas).

Kumulativu kazu konfirmadu sura hosi 21 marsu 2020 to’o 31 jullu 2021 hamutuk 10.898. Hosi horisehik mai ohin, teste ne’ebé Laboratóriu Nasionál Saúde halo hamutuk 709 PCR, ho detallu hanesan tuir-mai: Vijilánsia sentinela ida (1), rastreiu ba kontaktu ka Contact Tracing 236, Rastreiu Aleatóriu ka Random Screening na’in-91, Viájen sai-hosi serka sanitária hosi Dili 311 Viájen internasionál ualu (8), Follow Up iha kuarentena na’n-62.

Totál teste PCR ne’ebé halo horisehik 30  jullu iha Munisípiu-sira seluk, RAEOA no HNGV hamutuk 233 ho  detalla hanesan tuir-mai, Maubisse 33, Maliana 17, Viqueque 18, Covalima 36,  Baucau 47, Ermera tolu (3), RAEOA hitu (7), HNGV 72.

Totál doze vasina ne’ebé fó ona ba populasaun elijível tinan 18 ba leten to’o ohin (sábadu) dadeer 10h00, loron sesta 30 jullu tuir sistema informasaun Sáude iha Ministériu Saúde ne’’e totál kumulativu doze dahuluk iha Dili 137,585 (64,4%), totál kumulativu doze daruak iha Dili 84,667 (39,60%), ema ne’ebé simu ona vasina doze dahuluk iha Timor Leste 288,483 (38,2%) no simu ona doze daruak 98,322 (13,03%).

 Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-nain epidemiolojia nian uza mak insidénsia.

Konvensionalmente insidénsia sukat totál kazu foun kada loron pur mil abitante no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus mak 6,1/100 mil abitante, enkuantu ba de’it Munisípiu ERMERA 38,9/100 mil abitantes.

Iha semana ida-ne’e, insidénsia iha Munisípiu Dili tun ba 4,9/100 mil abitantes, tuir kedas ho Munisípiu Viqueque ho valor 5,2/100 mil abitantes.

Ida-ne’e hatudu katak Insidénsia Munisipiu Ermera nia maka aas-liu entaun Munisípiu tolu hanesan Ermera, Dili, Viqueque mak iha risku bo’ot liu atu populasaun hetan da’et no hada’et tutan virus SARS-CoV-2 iha komunidade nia le’et.

Evolusaun COVID-19 iha Ermera

Evolusaun surtu COVID-19 iha Munisiiu Ermera durante semana ida ikus nia laran. Númeru kazu pozitivu hahú aumenta maka’as iha loron 24 de Jullu 2021, bainhira relata 36 kazus iha loron ida de’it.

Ekipa saúde halo rastreiu kontaktu (contact tracing) hahú loron 26 jullu ne’e, deteta kazu pozitivu 18 ne’ebé relata iha loron 27 jullu, 123 iha loron 28 jullu, 112 iha loron 29 jullu, no relata kazu pozitivu hamutuk 13 iha loron 30 jullu.

Ohin, sábadu (31 jullu), relata kazu pozitivu hamuutk 114. Ekipa saúde servisu hamutuk ho autoridade administrativa no autoridade komunitária sira, nafatin halo rastreiu kontaktu iha Munisipiu Ermera.

Informasaun hosi izolamentu

Iha 31 jullu 2021, izolamentu Vera Cruz halo tratamentu ba kazu detetadu na’in-15, iha área obstetrisia na’in-neen (6), iha medisina interna na’in-lima (5), iha sirurjia na’in-tolu (3), pediatria na’in-ida (1).

Iha obstetrisia na’in-neen kategoria leve (mild) hotu. Iha área medisina interna na’in-lima (5) no hosi na’in-lima ne’e ema na’in-ida (1) kategoria moderadu, haat (4) leve (mild). Sira na’in-tolu (3) iha sirurjia kategoria leve (mild) hotu no ida (1) iha pediatria kategoria leve.

Númeru kazu moderadu no grave ne’ebé baixa iha Vera Cruz, hatudu katak bainhira ema barak liu detetadu pozitivu, barak-liu tán mak sei baixa ho kategoria moderadu no grave.

Aproveita fó hanoin ba públiku katak Konsellu Ministru deside ona atu impoin serka sanitária ba Munisipiu Ermera, no konfinamentu domisiliar jeral ba Postu Administrativu Ermera ho Railaco.

Informa mós ba populasaun tomak katak ema-ne’ebé simu ona vasina doze daruak hasoru virus SARS-CoV-2–naran vasina ida, hosi hirak-ne’ebé rekoñesidu hosi Organizasaun Mundiál Saúde-bele ona sirkula livremente tama ka sai serka sanitária, la presiza hetan autorizasaun esepsionál hosi Diretór Centro Integrado Gestão de Crises no bele mós sirkula livremente iha fatin hirak ne’ebé Governu deside atu impoin konfinamentu domisiliáriu jerál. Presiza de’it hatudu prova kona-ba hetan ona vasinasaun kompletu.

Informa ba jornalista no públiku tomak katak ema-ne’ebé rekuperadu ona hosi moras COVID-19 no liu ona hosi izolamentu terapéutiku domisiliár (iha uma-rasik) ka iha fatin ne’ebé Estadu prepara, bainhira atu dezloka sai hosi ka tama ba serka sanitária, la presiza halo teste swab, maibé nafatin presiza hetan autorizasaun esepsionál hosi Diretor CIGC, atu bele prosesa autorizasaun esepsionál tenke hatudu Sertifikadu Alta hosi Izolamentu ne’ebé Ministériu Saúde liuhosi ninia Pilar 7, fó ba ema rekoperadu.

Apelu

Apela ba populasaun iha Timor-Leste laran tomak atu tu’ur hakmatek, kumpre ho rigór regra serka sanitária no konfinamentu domisiliáriu ne’ebé Konsellu Ministru desideona implementa hahú 30 abríl no estende tan ona semana rua ba oin.

Husu atu hotu-hotu kolabora ho autoridade saúde hodi bele buka-tuir ema hotu ne’ebé hetan da’et ona virus ne’e no izola hosi no labele hada’et-tutan ba ema ne’ebé seidauk hetan da’et.

Ba populasaun tomak, favór respeita nafatin regra prevensaun no ijiene individuál ne’ebé Governu hatuur ona atu prevene moras COVID-19 da’et ba mai.

Regra sira ne’e mak hanesan uza máskara, fase liman beibeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta-malu la presiza kaer-liman, bensa-liman, rei-malu ka hakuak-malu, evita halibur-malu barak, hamriik ka tuur dook hosi ema seluk mínimu metru ida ho balun.

Jornalista : Felicidade Ximenes

Editór       : Cancio Ximenes

HAKEREK NO HATÁN

Please enter your comment!
Please enter your name here